Perintah bebendar ngemajuka Belaga

0

Sukung rayat ngagai BN beguna amat dikena neruska projek pemansang: Billy

BELAGA: Kaban Parlimen Hulu Rajang Datuk Billy Abit Joo meri jaku pengingat ngagai orang ke diau di Kejaman Neh, Belaga perintah sigi enda bebula deka mai mayuh agi pemansang ngagai Belaga, taja pan menua tu jauh ari mengeri.

“Indah, maya penemuai Menteri Besai Datuk Seri Najib Tun Razak ke Belaga ba pun taun tu tadi, mayuh projek pemansang udah digerah lalu semua nya deka dipejalai nitihka perambu asal ungkup perengkaguna sereta pemanah genturung orang menua tu.”

Ku iya bejaku maya ti ngulu pengerami Tuai Begulai enggau Rayat di Kejaman Neh, Belaga, bedau lama ke udah.

Billy madahka sungkak rayat ke majak nyukung perintah Barisan Nasional (BN) nya besai amat guna dikena nentuka projek-projek pemansang ke bisi diatur nya ulih diterus, indah deka ditambahka .

“Pemaju sereta pemansang di Belaga enggau Baleh sekumbang lima taun tu,nya tanda ketuai kitai bejalaika tanggung pengawa ke senipak enggau slogan ‘1Malaysia Rakyat Didahulukan Pencapaian Diutamakan’.

“Agi mayuh bengkah pemansang ti deka dikemujurka dalam renggat perambu ungkup Hulu Rajang, kelebih agi ari sukut pemansang rengka guna mensia mayuh engau rengka rama.

“Perintah diatu amat angkunka pekara ke dipeguna rayat lalu enggau senaka ulih deka ngemenuhka peminta rayat ” ku iya .

Enggau nya mega, iya meri terima kasih ngagai genturung orang di Kejaman Neh ke udah ngundang iya ngulu pengerami nya, sereta tuai-tuai raban bansa enggau rayat ari Baleh ke bisi datai.

Billy mega madahka ngagai orang di Belaga senentang kerembai pengawa ngaga jalai alun Bakun- Belaga ke benung dipejalaika.

“Aku empu udah matau lalu nyengau projek nya deka tetap dipejalai nitihka langgur,” ku iya.

Iya mega sempat ngagih duit ungkup penyampau RM80,000 dikena ngemanahka rengka guna mensia mayuh ungkup rumah panjai di Kejaman Neh enggau duit bantu ngagai 20 iku orang tuai ditu.