KOUNSIKAAN ... Datuk Johnny Mositun (poindikau) miampai di Daniel Jebon (gibang) om Elizabeth Sikayun di kahapas pinituubungan
KOTA KINABALU: Ukadon mahik oh susuzan haid tuhun Kadazandusun Murut maza kapambasaan kavagu do buuk ‘Susuzan Totopot do Sabah’ sinuat di momuu’an haid do tuhun tokou, Tongotiagak Datuk James Ongkili.
Iho nopo nga pinointahang di Kumoduvo Momuumuntu do Pitimbungakan Koundangan Pogun (DUN) Sabah, Datuk Johnny Mositun ontok minonoimo do kinotombuhuzan kapantangan mantad di Poniikoon Kalab Monunuat Kadazandusun Murut (KDM), Daniel Jebon Janaun om ih Elizabeth Sikayun id koobian mantad upis di Tan Sri Datuk Dr Herman Luping id upis dau di koniab.
“Izou sondii nga nokokito haid do buuk dii (Susuzan Totopot do Sabah) nga au zou po kozo insan nakaavi do minambasa. Ahaid no gia kozo buuk di do nakahabus om ii no kozo buuk di agazo kozo lati montok do tuhun tokou,” ka di Johnny ontok pinituubungan nokomoi.
Tumanud di Johnny, ounsikou kozo isido tu nakaanu oh Kalab Monunuat KDM momusoou mangazu do pibaasan kokomoi do buuk diho om do hobi po di kozo do agazo lati songian do oputan di Tan Sri Dr Herman Luping manaak pomiumanan om pomuandaman kokomoi do kinotihombuson do susuzan buuk diho kokomoi do koposizon tuhun tokou.
“Ontok pibaasan kokomoi do buuk diho, kotindapou nogi Tan Sri Herman Luping montok manaak bobooson dosido,” ka di Johnny miampai pinopointahang do pibaasan nopo diho nga punganan do ‘Forum Susuzan Totopot do Sabah, KDM id Suang Pogun Mordika’. Forum nopo diho nga miondot do Pituubungan Monunuat KDM V ih kaanjul doiho id Dewan Mositun Papar mantad jam 12.30 doungadau gisom jam 4.00 minsosodop ontok 11 Disember diti mikot.
Ontok pituubungan diho, kapanau nogi oh koponohuadan zaa, pokitanan buuk sinuat tuhun Kadazandusun Murut, kopointahangan suang buuk Susuzan Totopot do Sabah ih pohombuson di Henry Bating, kopointahangan pomiumanan di Tan Sri Dr Herman Luping kokomoi do pogigizon tuhun KDM Poingamung id Pogun Malaysia, Forum buu’anon di Dr Ramzah Dambul ih monguhud po nogi do kootuson pituubungan diho.
Montok diho, agazo ginavo di Johnny magahap do tuhun Kadazandusun Murut ngavi montok mikot tumindapou do pituubungan diho mongoi do kapanaak nodi do pomusaavan kokomoi do pogigizon tuhun tokou sohinaid diti.