DR TIKI
KUCHING: Kaban Parlimen Mas Gading, Datuk Dr Tiki Lafe madah, berita ke ngenang iya deka bediri nyadi chalun ngatika diri ba pengawa bepilih besai menua (PRU ke-13) tu ila, nya enda bendar.
Iya madahka, nadai dalam runding iya deka bediri nyadi chalun ngatika diri taja pan nama iya udah diputuska enda dirintai nyadi chalun dalam PRU ke-13 tu ila.
“Taja pan enda dichalun sekali agi ngena tikit Parti Demokratik Progresif Sarawak (SPDP), tang enda meh aku milih nyadi chalun ngatika diri.
“Baka tu meh dunya politik, bisi maya niki, bisi mega nurun. Kadang-kadang kita bepangan, udah nya nyadi munsuh tang udah nya kitai bepangan baru.
“Chalun ngatika diri ukai jalai ke dipilih aku, jauh sekali masuk parti bukai.
“Awakka penanggul tu tenai, udah nya baru kitai beratika nama utai ke patut di gaga. Pengawa aku bedau abis taja pen aku ukai raban SPDP agi,” ku iya madah lebuh ditalipaun Utusan Borneo kemari.
Iya nambah baru, maya ke diatu awakka iya meri tumpu ngagai pengawa iya ti nyadi Chairman Majlis Latihan Khidmat Negara (MKLN).
“Utai ke berat diatu iya nya meri tumpu aku ngagai MKLN, nentuka peneka perintah ulih dijapai,” ku MP Mas Gading tu.
Kelimpah ari nya, berita dipansut ari Barisan Nasional (BN) nyemetak madahka Tiki agi Kaban Parlimen BN lalu deka terus bejalaika pengawa iya ba sitak Mas Gading.
Nitihka berita nya, barang sapa ke nguji nyekat Tiki ari ngereja pengawa ba sitak parlimen nya, reti nya ngelaban BN.
“Nadai sesapa ulih nyekat Tiki nyadi Kaban Parlimen BN dia, laban sebarang pengawa nya mai reti ngelaban BN.
“Jaku tu di tuju ngagai sida ke bisi ati deka ngelaban Tiki enggau raban 5 iku SPDP 5, semua sida ke ngachau pengawa Tiki nya sebaka enggau pengawa anti-BN,” ku berita nya.
Sebedau dituduh megai pengawa nyadi Chairman Pengerusi MLKN, Tiki kala megai pengawa nyadi Sapit Menteri Pemansang Menua Pesisir enggau Tengah dalam taun 2004 tang iya nadai diambi baru sepengudah pengawa bepilih besai menua dalam taun 2008.
Ketegal enda nyadi Sapit Menteri nya, tu ti ngujungka sekeda raban bansa Bidayuh enda lantang ati laban nadai pengari ari bansa nya ngarika sida iya ba kabinet perintah besai.
Ba pengawa bepilih besai menua dalam taun 1999, Tiki menang nengah majoriti 10,684 undi, majoriti 10,579 ba taun 2004 lalu mengkang ngetanka kerusi nya dalam taun 2008 nengah majoriti 8,551 iti undi.