RABAN BARU: Mawan nerima pom nyadi raban parti disua Lau enggau Wong (kiba enggau dua kiba) ba siti pengerami di Pakan hari Enam tu tadi.
Pemutus berindik ari penyarut nya digaga endang ungkup parti sereta ukai ngemeratka seseiku: Mawan
PAKAN: Seraban 158 iku udah ngerejister diri nyadi kaban baru Parti Demokratik Progresif Sarawak (SPDP) sereta udah nyuaka pom nya ngagai SPDP pampang Repok, Sarikei.
Pom nya udah disuaka nyerumba Pengerami Begulai Enggau Ketuai ti diatur ba Dewan Mensia Mayuh Pakan ditu kena Lemai Hari Enam nyin kemari.
Pom nya mega udah disuaka ngagai Sekretari SPDP pampang Repok, Lau Yuk Ping enggau Wong Siew Huo.
Lebuh ti bejadika pengerami nya, Mawan meri besai terima kasih ketegal udah nyukung iya ngiring parti nya ngelama tu.
“Taja pan parti diatu betapi enggau penyarut, kami arap bala raban parti tu meretika pemutus ti udah udah diputuska kelebih agi bekaul enggau ukum ti nggang raban SPDP5 ti udah diputuska komiti disiplin apin lama ti udah.
“Pemutus nya ungkup parti tu empu lalu ukai ngemeratka seseiku aja,” ku Mawan.
Kitai patut berunding ngatur singkang baru dikena negapka agi parti tu ngambika mengkang beguna lalu nyeliahka ari sebarang penanggul ti tau ngelabuhka parti, ku iya.
Pengerami nya digulu urung 500 iku orang ti mega digulu Sekretari Politik Kepala Menteri, Paul Igai enggau Peter Howell.