BINTULU: Gerempung Pemansang Bintulu (BDA) nengah kerjasama Opis Residen sereta Opis Lumba enggau Main deka ngatur Pesta Ai Bintulu kena 9 nyentukka 10 Disember tu.
Menijar Besai BDA, Datu Mohidin Ishak madahka, tuju aktiviti nya dipejalaika laban deka ngelakuka Bintulu Promenade nyadi palan rekreasi enggau ngelantangka ati.
“Rayat ba Bintulu diperansang sampal datai beperindang sereta ngambi bagi ba pengerami ke bisi diatur,” pia ku iya bejaku lebuh sidang pengarang ba Opis Residen kemari.
Mohidin madahka, mayuh macham pekit deka diatur dikena ngeramika agi program nya ila.
“Komiti Pengatur Progrem udah ditumbuhka kena ngemujurka program ngambika enda tejanggal.
“Nambahka nya, perais ke manah mega deka nganti raban ke menang ba pekit tu ila,” pia ku iya bejaku baru.
Pesta Ai Bintulu deka ngatur tiga bengkah pekit ti diungkupka ngagai mensia mayuh iya nya Pekit Jetski, Pekit Nginti enggau Pekit Lumba Rayat Ai.
Nitihka penerang, Pekit Jetski diatur nengah kerejasama enggau Gerempung Jetski Miri lalu disadangka raban penyereta ari Miri, Brunei enggau Limbang deka ngambi bagi ba pekit nya.
Berebak enggau nya, Pekit Jetski deka dibagi ngagai dua kategori iya nya 800 cc ke baruh enggau 1200cc ke baruh.
Perais lumur satu ungkup 800cc deka nerima mata duit RM3,000 besereta trofi lalu lumur satu bagi 1200cc deka bulih RM3,500 enggau trofi mega.
Kelimpah ari nya, mensia mayuh mega ulih enggau ngambi bagi ba Pekit Nginti ti diatur kena 9 Disember urung pukul 8 pagi.
Beserimbai enggau pengerami nya, Pekit Lumba Rayat Ai mega bisi dipejalaika baka pekit malu panggal, pekit niki tiang dalam ai, pekit nangkap bol dalam ai, pekit narit tali dalam ai, pekit tanglung ai enggau pekit ke bukai.
Penerangka silik bekaul enggau pengerami tauka pekit ke bisi diatur tau betanya ngagai Pemesai Opis Lumba enggau Main Bintulu, Juwairah Mohd Zain ba lumur 086-333786.