Bisi 236 buah kedai dipadu nyendiaka barang pemakai napi penusah ampu bah ba serata S’wak
KUCHING: Opis Dagang Dalam Menua, Koperasi enggau Pekara Bebelika Barang (KPDNKK) madahka bekal pemakai chukup napi guna mensia mayuh ba serata Sarawak maya penusah bah.
Direktor KPDNKK Sarawak Wan Ahmad Uzir madahka genap pemekal barang pemakai enggau perengka bukai ngembuan chukup stok ke deka diagihka ngagai orang ke kena tuntung penusah bah barang maya.
“Kitai udah milih 236 iti kedai ba serata Sarawak meri bekal pemakai ke diguna mensia mayuh enti penusah bah bisi nyadi.
“Atur tu disediaka tumu ngambika ulih nentuka semua bekal pemakai ke diguna mensia mayuh chukup sereta ulih disadung enggau jampat ngagai kandang endur ke kena ampuh,”ku iya.
Maya bah, bekal pemakai baka berau, gula, tepung, susu, minyak, kopi, roti, garam enggau miyak (petrol enggau diesel) dikemeratka diagih ngagai palan pengenduh bah, tandu iya.
Iya mansutka jaku tu ba aum begulai enggau orang dagang (pemekal Kuching – Serian) ke udah dipilih nyadi pemekal barang pemakai ba opis KPDNKK ditu, kemari.
Ku iya, riput ari Opis Pengemata Gaya Hari madahka berengkah ari 15 Disember nyentuk ke pengujung bulan Januari 2012, menua Sarawak deka nerima ujan ke mayuh ari selama tu lalu sekeda kandang endur ke baruh disadang deka ampuh.
“Kitai nyadang kandang endur Bau, Matang, Siburan, Asajaya, Simunjan, Sebuyau enggau Asajaya deka ditiki ai.
“Enti mensia mayuh ba kandang endur tu dipindah ngagai palan pengenduh (palan) ke ulih ngundan 234, 126 iku , kitai enggau opis Pengintu Pengelantang Pendiau (JKM) deka nentuka raban tu nerima bekal pemakai ke chukup,”ku iya.
Iya mega ngelalau raban orang dagang enda sengapa nikika rega barang maya mensia mayuh begunaka pemakai kena napi penusah ampuh.
“Suah didinga nyadi, orang dagang nikika rega barang maya penusah bah nyadi.
“Opis KPDNKK deka ngeletakka ukum ke terit ngagai orang dagang enti ditemu nikika rega barang sengapa maya nya,”ku iya.
Sida iya tau diukum Rm100, 000 tauka jil sepengelama tiga taun nitihka ‘Akta Kawalan Harga Barang’ enggau ‘Anti-Pecatutan 2011’, tandu iya.
Nitihka atur maya ampuh, JKM deka ngambi pemakai ari kedai ke udah dipilih ba serata Sarawak lalu diagihka ngagai palan pengenduh lalu opis KPDNKK megai tanggung pengawa semua atur nya dipejalaika.
Bisi 236 kedai ke udah dipilih nyengkaum 30 buah ba Kuching, 35 (Samarahan), 10 (Sri Aman), 31 (Betong), 30 (Sarikei), 8 (Sibu), 15 (Mukah), 9 (Kapit), 8 (Bintulu), 26 (miri) enggau 34 ba Limbang.
Sama datai ba aum nya Sapit Direktor KPDNKK Sarawak Abdul Rahim Ibrahim enggau Pemesai ari opis JKM Fudin Chee.