Dadah kigatang RM3.3 riong nahau kagu id LTAKK

0

NAHAU...Datuk Hamza Taib (duwo wanan) songowian Luguan JSJN IPK Sabah, Superitendan Rahim Dolmat (tolu mantad wanan) om upisor ngawi dau ih susuai popokito do syabu ih nahau mantad 'suspek' id LTAKK Terminal 2 di tadau Koiso nakatalib.

KOTA KINABALU:  Haro noh pipiro tadau kalapas 10 kilogram ketamin kigatang lobi RM132,000 nahau kasitum id Tutubpoon Kapal Tumulud Sompomogunan Kota Kinabalu (LTAKK) Terminal 1 di tadau Kolimo nakatalib, tinimungan pulis Sabah nopo nga nakaanu minamagahau 11 kilogram syabu kigatang RM3.3 riong, ih nogi pinamahauan poinggagayo toun dit id LTAKK Terminal 2 hiti di tadau Koiso nakatalib.

Kinantakan kiikira jam 10.40 dongotuong dino kapaamung do songulun tulun kinoiyonon mantad Keningau kiumur 31 toun soira isio kikotumbayaan minogowit dadah dino nokomoi mantad Kuala Lumpur montok tujuan potikidon id pointongkop pogun.

Pesuruhjaya Polis Pogun, Datuk Hamza Taib minoboros minaganu laang kalapas nokotorimo kopoilaan, sontimungan pulis mantad Koupisan Ponoriukan Jinayah Narkotik (JSJN) Longkod Upis Kontinjen (IPK) Sabah pinapanau pongintangan kumaa ‘suspek’ id tutubpoon kapal tumulud dino.

“Suspek tinahan do namot disio kiharo id labus longobon korikotan om ontok tinahan ‘suspek’ dino maso mogowit iso kantung sandangon om duwo kantung pakaian.

“Asil pinomorisaan di pinapanau, nokokito pulis dino do 13 paket plastik kisuan syabu ih pinolisok idsuang piipiro paket plastik teh herba Sina om piipiro kotak tinumon kaauk.

“Ponoriukan nokopogulu noilaan winagat anggaran koinsanai dadah dino nokomoi nga 11 kilogram miampai gatang dagang kiginumu RM3.3 riong,” ka dau id pitimbungakan abar id IPK Sabah, Kepayan doros hiti di tadau Koduwo nakatalib.

Tumanud dau, maya ponoriukan nogi nokoilo suspek kiharo rekod jinayah laid ih kopohompit do dadah om isio baino diti nogi kakaal poh id kapadtamangan Agensi Anti Dadah Kabansaan (AADK) id siriba Akta Penagih Dadah, Pongubatan om Pomolingasan.

“Pogului diti, nokoumbal nogi suspek dino noilaan kisalah sabap minaganu dadah om isio pinaamung id siriba kapadtamangan solinaid duwo toun id nonggo apatut do opupusan Mei toun tabantalan.

“Au nogi pabanaron suspek dino do lumabus mantad watas Keningau miampai aiso kabanaran, poingkuro poh nga soriukon do pulis do nokoumbal nangku isio minokianu kabanaran montok lumabus mantad boogian kapadtamangan toiko au,” ka dau.

Kawagu di Hamza, suspek baino diti tinahan reman solinaid turu tadau gisom 18 Disember tabantalan montok ponoriukan tumanud Seksyen 39B Akta Dadah Koligogon 1952 ih kopogowit do ukuman giwison gisom apatai nung karait kasalaan.

Ontok tadau Kolimo nakatalib id LTAKK nogi, nakaanu kositum minamagahau 10 kilogram ketamin kigatang lobi RM132,000 mantad kantung ih nowit di duwo tulun Semenanjung.

Dadah dino nokomoi kikotumbayaan nowit mantad pogun China om goduwo-duwo suspek ih mantad Pulau Pinang dino nogi noilaan do minumbayah id Kota Kinabalu solinaid duwo tadau mantad Hong Kong pogului kuminaa doid Kuala Lumpur.

Poingkuro poh nga, soira korikot id LTAKK Terminal 1, popogirotkuasa Koupisan Kasitum Idraja Malaysia (JKDM) Sabah ih pakaraja nakaanu nokokito koinsanai dadah dino ih pinolisok miampai minomolopot miampai karatas karbon om karatas opurak.

Goduwo-duwo suspek ih kiumur 26 om 24 toun dino nogi soriukon tumanud Seksyen 39B Akta Dadah Koligogon 1952.