Tuesday, November 12

Penyampau kes kerita ke kena churi ngirauka kompeni insurans

0

INSTITUSI WANG BUKAI PATUT ULIH NERIMA POLISI ARI KOMPENI INSURANS BUKAI: Paul (ngarika Tan Sri William Mawan) ngetas riben muka pampang opis baru MPIB ba Kuching.

KUCHING: Pemayuh kes bechurika kerita enggau bakal (3rd party bodily injury) kelimpah ari reta tengkira ke rusak ketegal pengelalek mensia ngujungka kompeni insurans betapi enggau pengerugi, lalu tu enda tau enda dikemeratka kompeni insurans.

Menteri Kanan Sarawak ti mega Menteri Pemansang Rama enggau Urbanisasi, Tan Sri William Mawan Ikom madah, patut bisi atur ke nyemetak endar baka ngena perengka ‘anti-theft devices’, ngaga perengka elektronik tauka barang chara sistem tracking ke meri penguntung enggau ulih mantu nyeliahka sebarang penanggul.

“Kompeni insurans enggau gerempung sida iya patut ngembuan kaul ke terit enggau polis diatu, lalu mantaika strategi sida iya ngurangka pengawa kerita kena churi lalu ngemanahka agi chara ngulihka kerita nya pulai baru,” ku iya.

Iya madah baka tu ba teks jaku ke dibacha  Sekretari Politik ba Opis Kepala Menteri, Paul Igai ba atur pengawa, muka pampang opis Insurans Multi-Purpose (MPIB) ba Jalai Tun Ahmad Zaidi Adruce ditu, kemari.

Iya nambah baru, Perintah benung ngatur pemansang ke progresif, ekonomi sereta ngemanahka agi pendiau pengawa rama mensia mayuh menua tu.

Tang taja pia, ku iya, dalam pemansang baka nya, mega narit utai ke enda manah dalam penanggul mensia mayuh.

“Nya alai, risk management MPIB berat lalu patut dikereja laban nya ke nyaga pejalai dagang sida iya,” ku iya.

Kelimpah ari nya mega, ku Mawan baru, siti agi bansa penanggul ke seruran di tapi mensia mayuh, iya nya sida nadai pilih insurans bukai lebuh nginjau lon ari bank.

“Dalam mayuh gaya baka tu ke udah dipeda, pelanggan bank nadai pilih bukai lebuh sida iya nyain perambu rumah angus enggau sekeda dokumen bukai ke lon reta tengkira.

“Gaya baka tu baka ke enda pilih bukai, lalu enti sema enda dikemansang, nyangka pemegai polisi enda teulihka penemu insurans professional bukai,” ku iya.

Iya ngarapka sida ke ba industry insurans patut beratika pekara tu enggau serius, sereta institusi wang bukai mega patut nerima polisi ari semua kompeni insuran ke belisin ari Bank Negara.

“Ngambika pemegai polisi bisi pilih bukai, kelimpah ari kompeni insurans dilalau terus belajar ngemanahka agi penemu sereta pengelandik sida iya dalam insurans ngambika penemu kita ulih dikenataika ngagai pelanggan kita,” ku iya.