BINTULU: Program Mesra Belia ti deka diatur ba Dewan Suarah kena 16 nyentukka 17 Disember disadangka ulih ngempuru urung 1,000 raban nembiak ba menua Bintulu.
Pemesai Pelilih Menua Bintulu, Tuah Suni madahka, program nya ulih ngerapitka kaul antara mensia mayuh kelebih agi raban nembiak begulai enggau tuai raban bansa.
“Nambahka nya, dikearapka raban nembiak ulih nemu enggau silik senentang atur enggau tanggung pengawa ke patut diangkunka kelebih agi kena ngemansangka penau enggau pengelandik ke dikembuan sida,” pia ku iya.
Iya ngemansutka jaku nya lebuh bejadika pengawa sidang pengarang ba Opis Residen ditu kemari.
Nandu nya baru, Tuah madahka mayuh macham aktiviti ti ulih narit ati mensia mayuh ngulu pengerami nya.
“Mayuh pekit udah diatur ungkup mensia mayuh baka pekit Pemajik Gamal Raban Nembiak Sarawak P217 Bintulu, pekit betanda moden, pekit karaoke, pekit ‘Battle of The Band’ enggau pekit Senam Kenyalang,” pia ku Tuah bejaku baru.
Nitihka penerang, progam nya diatur nengah kerejasama Opis Pemansang Rama (KPS) Bintulu begulai enggau Parti Demokratik Progresif Sarawak(SPDP) sereta Opis Lumba, Main enggau Nembiak Bintulu.
Menteri Pemansang Rama, Tan Sri William Mawan anak Ikom disadang bejadika pengerami nya kena 16 Disember tu.
Kelimpah ari nya, Menteri Muda Pemansang Nembiak, Abdul Karim Rahman, Menteri Muda Perengkaguna Mensia Mayuh Datuk Dr Stephen Rundi enggau Kaban Parlimen Bintulu, Dato Sri Tiong King Sing disadangka sama datai ngulu pengerami nya.