Indu Opis SUPP kala nerima kangau telefon ari seiku lelaki

0

KUCHING: Indu Opis Parti Sa’ati Rayat Sarawak (SUPP) kala nyambut telefon ari seiku lelaki ke enda dikelala sereta madahka diri deka nunu Indu Opis nya ba bulan Oktober tu tadi.

Pekara nya dibantaika Sek­retari Besai parti, Prof. Dr Sim Kian Hui ba aum media ditu, kemari, ke bisi mega ngan­gauka Ketuai Raban Nembiak Tan Kai enggau Ketuai Raban Indu, Tnay Li Ping.

Jaku lelaki nya ke munyi ngasuh orang takut, ngujungka pemesai SUPP melaba bilik aum Komiti Palan Pengawa (CWC) ke angus kena empa api nya bisi kaul enggau telefon lelaki nya.

Tang taja pia, iya nadai madah sapa ke dipelaba bisi ngereja pengawa nya, laban ku iya, pekara nya agi dipansik polis.

“Nitihka riput polis ke di­gaga parti nya, urung pukul 1.30 pagi, 29 Oktober tu tadi, seiku orang ke gawa ba opis nya madahka iya bisi nerima telefon ari seiku lelaki ke ngugut deka nunu indu opis parti nya.

“Riput polis mega bisi digaga kena 5 November, udah ngira pengelikun orang ke gawa ba opis parti sereta opis nya empu…..Siti salin riput tu udah diserah ngagai polis,” ku iya.

Iya nambah, utai ke ngalitka ati, sebedau opis nya kena tunu, semua kamera litar tetutup (CCTV) ke dipasang ngelingi opis parti nya padam belabuh ari 9 Disember lalu nadai seiku pen nemu pasal pekara nya.

“Taja pia, aku enggai nyebut sapa, awakka sida ke patut na­sat pekara tu bejalaika pengawa sida iya. Ngarapka Bomba ulih meri riput sida enggau jampat, ngambika ulih dipadah ngagai orang mayuh,” ku iya.

Ku Dr Sim baru, maya Indu Opis nya angus, nadai sebarang dokumen ke bisi disimpan ba opis maya nya, semina utai ke ditulis maya aum sebedau tu.

“Kami enda kala nyimpan dokumen ke berat dalam bilik nya, lalu iya enda kala dikunchi, ke semina bisi dia, surat ke ditulis maya aum ke enda berat bisi ditinggal maya nya,” ku iya.

Iya madah, kena nyaga pengelikun opis nya jemah ila, semua dokumen ke berat patut bisi salin lalu disimpan ba endur ke likun agi.

Kena 13 Disember tu tadi, opis Bomba bisi nerima telefon urung 3.15 pagi ke madahka Indu Opis nya angus lalu udah nya sida iya nganjung dua buah kerita sereta injin pemadam api ari Balai Bomba enggau Penyah Penusah Kuching ke ngesah penusah nya.