KUCHING: Nadai pejal enti sema raban penyukung Sapit Sekretari Besai Parti Sa’ati Sarawak (SUPP) ke suba Dato Sri Wong Soon Koh enggai bebaik sereta mulaika diri ngagai parti, ku Sapit Presiden Datuk Richard Riot.
“Enti sida enggai, nya ni ku sida laban sida udah milih enggai agi sejalai enggau kami (ngemudika SUPP) kati ku deh?,” ku iya lebuh dikerandau Utusan Borneo, ensanus.
Iya bejaku lebuh ti dipinta bekenangka ripot Utusan Borneo kilah ensanus bekaul enggau raban Wong ke enda nerima pangku pengawa ke ditawar dalam rintai ketuai parti baru nyentuk ke tasat Opis Pengerejister Gerempung (ROS) tembu.
Ba hari ke penudi aum raban Pengari Tiga Taun Sekali (TDC) hari Minggu tu tadi, Presiden SUPP Datuk Seri Peter Chin udah ngagihka enam iti kerusi raban Komiti Kereja Pusat (CWC) nyengkaum penuduk Mandal Presiden ke enda diisi nya diungkupka ngagai raban Wong.
Raban Wong nyengkaum Kaban Parlimen Lanang Datuk Tiong Thai King, Kaban Kunsil Nengeri (ADUN) Opar Ranum Mina, ADUN Simanggang Datuk Francis Harden Hollis, ADUN Bengoh Dr Jerip Susil, ADUN Engkilili Dr Johnical Rayong.
Riot ke nyadi ketuai parti ari raban Bumiputera, ke lalu nyadi Kaban Parlimen Serian ngembuan pengarap semua pengari rayat Bumiputera mulaika diri ngagai parti.
“Tang taja pan pia, kitai agi ngarapka YB Bumiputera, agi enggau kitai,” ku iya.