KUCHING: Seiku orang ke gawa nyadi ‘Ikatan Relawan Malaysia’ (RELA) ngambika nyaga pengelikun mensia mayuh udah ditangkap polis kemari laban dipelaba bekaul enggau pengawa masung ipar iya ke agi biak (baruh umur) ti ngujungka betubuh bisi tauka ngandung.
Lelaki ke beumur 45 taun nya, ditangkap ba rumah iya empu urung pukul 11 pagi ba Samariang ke sama endur iya diau begulai enggau ipar iya ke beumur 15 taun enggau sida sebilik bukai.
Penusah nya ditemu sida sebilik lebuh nembiak nya madah ngagai indai iya ti mega raban RELA, iya bisi pedis perut lalu lebuh dibai beperesa ngagai klinik, nembiak nya di padah betubuh bisi.
Lebuh diitanya ngagai nembiak nya, iya madah ngagai indai iya, saspek ke jadi enggau menyadi tuai iya suah endar udah masung iya berengkah ari bulan Ogos tu tadi ke ngujungka iya betubuh bisi.
Lebuh dikerandau kemari, indai nembiak nya madahka anak iya sigi tinduk kediri lalu seruran ngunchi pintu bilik tinduk iya maya malam hari, tang saspek mujur tama ngagai bilik lalu masung iya.
Ku iya, iya bisi enda nyamai ati sereta meda penyelai lebuh beratika kaul anak enggau menantu iya laban diperatika seduai iya seruran enda betanya enggau pangan diri ba rumah.
“Kami sebilik selalu makai serumpu ninting hari tang bedau lama tu tadi, aku beratika anak aku tauka menantu aku nganti pangan diri, sapa ke udah badu makai, baru siku makai,” ku iya.
Diatu saspek benung kena tan riman laban agi ditasat.