Pengerindu anak mit tebantai ba pengerami KYKS

0

TU UNGKUP NUAN: Siku anak mit nyuaka bungai ngagai Jamilah ke datai bejadika KYKS.

KUCHING: Urung 33 iku anak mit mujur dikeramika ba atur pengawa Konvokesyen Yayasanku Sayang (KYKS) ke di pejadi Patron konvokesyen nya, Puan Sri Dato Jamilah Anu lalu sama diuluka Tuai Opis Yayasan Sarawak, Mohamad Abu Bakar Marzuki, ba Rumah Yayasan Sarawak ditu, kemari.

Ku Mohamad Abu Bakar, taja pen palan nya baru dibuka dalam taun tu, tang mayuh macham aktiviti udah diatur ungkup bala anak mit ke dijaga ba palan nya kelebih agi dalam proses meransang pengawa rama anak mit, nemuai lalu belajar, seni enggau adat, sains enggau teknologi, lumba enggau main enggau mayuh macham aktiviti bukai.

“Aktiviti ke diatur tu manah ungkup bala nembiak kelebih agi nitihka jaku rambai pelajar anak mit ba kelas sida iya.

“Penegap pelajar nya digaga nengah aktiviti pemungkal enggau peneleba nengah pejalai sida iya, utai ke dipeda, nguji ngangkatka pelajar ba bala mit ngayan ngagai sida iya, iya nya belajar ngerinduka ati,” ku iya.

Ba atur pengawa nya kemari, bala anak mit mantaika pengelandik sida iya belagu dalam koir, mandangka ngepan siti-siti pupu bansa ke diau ba Sarawak, lagu, pengerami nerima setipikit tembu besekula enggau mayuh macham agi.

Ku Mohamad Abu nandu, YKS (Yayasanku Sayang) nyangka deka ngerembaika pampang ngagai endur bukai kelebih agi ba pengawa nyukung Pemun Pelajar Anak Mit ba menua tu.

“Taska enggau tadika ba endur gawa dikearap ulih ngangkatka agi kualiti chara ngajar sereta nyaga anak mit, kelimpah ari ulih mantu apai indai ngurangka pengirau ati sida lebuh maya gawa laban berundingka anak nadai orang ngibun, lalu pemanah palan tu mega laban apai indai ulih beratika anak sida iya besemak enggau alai sida gawa,” ku iya.