Untak nembiak ke baru ada bisi 100 biliun neuron

0

BERI PELUANG MENDINGKA PENEMU ANAK KITA: Jamilah lebuh dikelaluka bala anak mit ari KTTYS lalu sama disambut Mohamad Abu Bakar (tiga kiba).

KUCHING: Pansik Neorosains ba pekara untak madahka anak mit belabuh belajarka pengelandik berengkah ari sida iya ada.

Untak anak mit ke baru ada udah bisi 100 biliun sel tauka neuron ke udah besedia deka bekereja.

“Dalam kandang tiga taun keterubah, untak anak mit ke aktif ngaga sinaps ke mayuh. Lebuh sinaps nya nyadi, mayuh agi kaul ke nyadi dalam runding anak mit.

“Kaul tu deka nambah enti anak mit nya terus ngerembai sereta mansang enti sida diberi penemu pelajar mayuh,” ku Patron Taska Tadika Yayasanku Sayang, Puan Sri Dato Jamilah Anu ba atur pengawa Konvensyen Taska Tadika Yayasanku Sayang (KTTYS) ba Rumah Yayasan Sarawak ditu, kemari lebuh nyebut jaku ari Pansik Neurosains.

Iya nambah asil ari pansik nya ngayanka pemun pelajar anak mit nyadi penegap bansa sereta pemansang adab tuju menua.

Kelimpah ari nya, iya madah, pansik nya mega ngayanka pemansang enggau pelajar anak mit deka nyadi manah agi lebuh apai indai sama-sama mantu anak sida dalam pelajar ari pun.

“Bisi jaku semabanding ke madah enti sayauka bini, iya suah ditinggal lalu enti sayauka anak suah agi dilunsin. Bisi kebuah lebuh orang madah, sayauka anak dilunsin laban penyayau apai indai ngajar anak ukai semina sayau, tuchum tauka meri jaku ajar tang dalam disiplin berat ba anak,” ku iya.

Iya nambah, anak tau nyadi penanggul enti apai indai udu ngemanjaka anak.

“Ketegal baka nya anak kelalu bepanggai ba apai indai tauka nyadi orang ke bingking enti seruran digaga ulih apai indai baka nya. Enti deka arapka anak, sigi tau, tang betatika utai ke dikarap kita (apai indai) ba anak kita,” ku iya.

Iya madah, anak pen patut diberi peransang dalam sida iya negapka diri ngambika sida iya arapka diri empu, ku iya.

“Terima anak kita enggau naka iya, beri peluang ngagai anak ngiga pengelandik sida iya empu. Puji sida enti sema bisi pemansang ke manah di peda kita (apai indai) ngambika ulih ngangkatka penaluk diri,” ku iya.

Atur pengawa KTTYS keterubah iya diatur ba Yayasan Sarawak, ke mega nyadi sejarah pengerembai sereta pemansang pemun pelajar anak mit ba Sarawak kelebih agi ba pengawa Palan Ngintu, Nyaga, enggau Ngajar Anak Mit ba endur gawa ke baru masuk setaun.

Sama bisi nguluka atur pengawa nya kemari, iya nya Kepala Opis Yayasan Sarawak, Mohamad Abu Bakar Marzuki.