Anwar gaga dilepas ari tuduh seraya mugar nama

0

GAGA ATI: Pengaga Ketuai Penyakal Malaysia Anwar Ibrahim disambut semua penyukung iya pengudah pemutus kot di Kuala Lumpur kemari 9 Januari 2012. Ketuai penyakal nya enggau ngenyit dikumbai enda salah ba pemutus pechara kes ‘beleman nyelai’ ke dikuasa jalai politik perintah ke deka ngeruga pengering iya maya pengawa bepilih ke deka datai tu taja pen pemutus nya ngiranka ati sekeda orang. — Gambar AFP

KUALA LUMPUR: Tuai Penyakal Datuk Seri Anwar Ibrahim ke dilepas ari tuduh beleman enggau pembantu iya ke suba nya, Mohd Saiful Bukhari Azlan ulih Kot Tinggi ditu madahka pemutus nya endang adil seraya mugar nama sida sebilik.

Anwar ke ditemu pemberita di peliling Kompleks Mahkamah Jalan Duta meri terima kasih ngagai raban luyar ti udah bepeluhka tuli sepemanjai kes pechara nya lalu besukur setegal sida sebilik, tuai Parti Keadilan Rakyat (PKR) enggau PAS semampai enda begilik meri sukung ngagai iya.

Bini Anwar, Datin Seri Dr Wan Azizah Wan Ismail ke mega ditanya bekaul pengasai ati iya madahka “Syukur Alhamdullilah” sebedau betemu enggau bala penyukung.

Berebak enggau nya mega, sekeda tuai penyakal ke bisi datai ngagai kot madahka pengaga ati sida di atas pemutus nya.

Presiden PAS Datuk Seri Abdul Hadi Awang, Mandal iya Mohamad Sabu, Kepala Menteri Pulau Pinang Lim Guan Eng enggau Sapit Presiden PKR Azmin Ali nyemaka pemutus nya nyadika siti rapat ngemunka pengarap orang ba badan hakim.

Bisi datai mega Menteri Besai Selangor Datuk Seri Khalid Ibrahim, Ex-Presiden Majlis Peguam Datuk S Ambiga ti madahka pemutus Hakim Datuk Mohamad Zabidin Mohd Diah nya endang engkeman lalu ngarapka isu ‘beleman’ nya padam.

Anwar, 64, ngakun enda salah kena 7 Ogos 2008 ba tuduh ‘beleman’ enggau Mohd Saiful, 26, di Kondominium Desa Damansara di Bukit Damansara ditu antara jam 3.10 lemai enggau 4.30 lemai kena 26 Jun 2008. — Bernama