RM30 riong montok sikul Sina, Mubaligh, tokong-tokong: Musa

0

SANDAKAN: Boyoon Montiri, Datuk Seri Panglima Musa Aman minoboros koporintaan pogun manahak poruntukan tagayo kiginumu RM30 riong montok sikul ngawi Sina, Mubaligh, tokong-tokong om susuai poh.

“Iti nopo iso mantad pinggisaman tokou om koinsamadan koporintaan Barisan Nasional (BN),” ka dau id ababayan kapanahakan toluod dau kumaa 400 tulun rayat Tionghua ih posodia manandak Toun Wagu Sina id Ups Umno Boogian Libaran, hiti konihab.

Isio ih nogi Montiri Kousinan Pogun minanamba pogului diti koporintaan pogun poposodia do poruntukan kiginumu RM2 riong gisom RM3 riong kumaa sikul ngawi Sina, Mubaligh, tokong-tokong om susuai poh.

“Tokou idsuang BN koilo tulun ngawi Sina diti manahak pongintangan totopot kumaa sikul ngawi om tokong-tokong diolo, om koporintaan BN poposodia do poruntukan di tagayo montok kogunoon diti,” ka dau.

Idsuang ahal dino, pokionuon nogi di Musa oh tulun ngawi Sina tuh tumilombus manahak sokodung poimponu kumaa koporintaan BN montok papatantu do kotundaan id pogun diti kapanau miampai tososonong.

“Kada tokou oruhai otombirangan miampai boros ngawi om janji ngawi au otopot tinan gugumaga hinonggo yolo diti (gugumaga) koilo mimboros au otopot noopo montok mokianu kosianan,” ka dau.

Mnoboros isio do misuai miampai koporintaan BN hinonggo buruan ngawi dau tumilombus kumaraja montok kopontingan rayat.

“Tumilombus tokou kumaraja montok papatantu do kopontingan rayat kotilombus oumolig om kotundaan kotilombus owit tokou doid potitikid boogian id pogun diti montok rayat,” ka dau. Id ramai dino, minamason nogi ih Musa Kopiwosian Toun Wagu Sina kumaa toinsanan rayat Sina di nokotindapou.

“Potitikid pangaramitan karamaian ih royohon tokou songowian ngawi do tikid toun lobi dati kopogirot do piombalutan toinsanan tinaru om iti nogi kopokito do pisompuruan tinaru di ubasanan tokou nopo nga impoon pisompuruan 1Malaysia,” ka dau.

Nokotindapou nogi id ramai dino nga, sawo dau Datin Seri Faridah Tussin; Puru Parlimen Libaran, Datuk Juslie Ajirol; Presiden Konsol kakadaian Sandakan, Datuk James Wong; Luguan Tinan Komulakan Umno Boogian Libaran,  Suhaimi Haji Nasir om buruan ngawi rayat Tionghua.