KOTA BELUD: Umno Sabah id siriba buruanan Boyoon Montiri Datuk Seri Musa Aman, nokosodia noh tumoguang pomilian tagayo pogun sundung pia nung pohoroon miampai monigowo, ka di Kumoduwo Luguan Tinan Piromutan Umno Sabah, Datuk Seri Salleh Said Keruak.
Minoboros isio do minggisom Umno Sabah manahak kamanangan montok popomilo do Luguan Montiri Datuk Seri Najib Tun Razak kaanu kuasa totopot id pomilian tagayo timpu rumikot montok tumilombus momorinta pogun.
“Injin boogian srriba Umno Sabah ogirot kopio. Tinan toiko injin dagai id boogian siriba nokosodia noh gumaga do Sabah, om songowian ngawi parti komponen suai sumiliu tolig kumaa Barisan Nasional (BN),” ka dau kumaa Bernama kalapas minomorikohon miting komiti pomilian Umno Boogian Kota Belud hiti konihab.
Salleh, ih nogi Speaker Lamin Koundangan Pogun Sabah, pokionuon minongomi ruputan agonsi abar AFP kosodop ih minongotu Najib sabaagi minoboros do aharap isio montok papaharo do pomilian au noh alaid mantad baino.
Poingkuro poh nga, noboros nogi di Najib id pinirumaan dau miampai Dow Jones Newwires do au isio papaharo do pomilian tagayo gisom kaanu popoturuk batos ih winonsoi di kawawagu montok popointutun do koponginwaguan ‘demokratik’.
Suai ko parti ngawi komponen kaampai mantad Parti Bersatu Sabah (PBS), Pertubuhan Bersatu Pasokmomogun Kadazandusun Murut (UPKO) om Parti Bersatu Rakyat Sabah (PBRS), toinsanan dino parti ih kapaamung do tinaru Dusun, om Parti Liberal Demokratik (LDP) kapaamung do tinaru Sina, BN Sabah nogi haro parti ngawi poinlongkod id Semenanjung miagal Umno, MCA, MIC om Gerakan.
Id pomilian ragayo 2008, BN Sabah nakaanu kamanangan osomok noh koinsanai 25 tirikohon Parlimen om 60 tirikohon pogun, naala nopo montok tirikohon Parlimen Kota Kinabalu om tirikohon pogun Sri Tanjung. -Bernama