MIRI: PAS Sarawak ngembuan pengarap ke tinggi ulih numbangka kubu kuat Barisan Nasional ba Pengawa Bepilih Besai ti Ke-13 (PRU-13) ti deka datai tu ila berindik ari gaya sukung mensia mayuh ke majak nambah ari pupu raban bansa ngagai parti nya.
Sapit Komisyener PAS Sarawak, Jofri Jaraiee madahka parti tu ukai semina negika nasit orang Islam tang nasit semua raban bansa enggau pengarap enda ngira di mengeri tauka menua pesisir.
“PAS semampai deka nyempil diri ngagai rayat lalu bedau lama ke udah bisi ngabang Taun Baru China dikena ngerapitka kaul parti begulai enggau raban bansa China ,” ku iya bejaku ngagai Utusan Borneo kemari.
Indah ku iya, nengah aktiviti ti baka tu , rayat Miri deka nyamai agi ngelala sereta nyempil PAS seraya ti nulak dawa PAS semina negika nasit orang Islam aja .
“Bisi mega kedua bedawaka PAS deka ditulak tauka enda diterima laban ku sida PAS semina sebuah parti ti ngemeratka Islam aja enda mikir penanggul ti ditapi orang bukai.
Dawa tu enda betul, semina sida ke buyanka penuduk sida dikeruga ti ngembuan anggap ke baka nya ,” ku iya .
Nitihka iya, PAS Miri udah ngayanka jaku dawa nya enda betul , nengah penumbuh Dewan Himpunan Penyokong PAS (DHPP) ke dipasuk mayuh bengkah raban bansa enggau pengarap.
“Enti PAS enda diterima semua pupu raban bansa enggau pengarap di Sarawak, udah tentu sida enda deka nyadi raban DHPP.
Jofri madahka, PAS semampai meri penerang ngagai rayat di Miri parti tu ukai semina beratka politik tang ngembuan tanggungpengawa nyaga pengelantang mensia mayuh.