Tebal apai indai ngemeratka bantu tu ngambika ulih ngelempung belanja nyengula anak: Azizmi
KUCHING: Bantu Rayat 1Malaysia (BR1M) enti meruan dipejalai taun dudi ila patut dikenataika ngagai penerima ba pun taun sebedau nembiak berengkah besekula.
Chara nya ulih ngelempungka belanja ruang bilik, ti dikena raban apai indai bebelika kereban anak ke besekula, pia ku Azizmi Morshidi, 41, ari Bandar Baru Samariang.
Iya madahka diri berasai temegah ati ngagai perintah ti ngemeratka pengelantang rayat, lebih agi tu keterubah iya diatur dikena nyaup rayat ngelempungka penanggul ba belanja.
Ku iya nandu madah ngagai pengarang berita, semua rayat ti patut nerima bantu nya endang patut sama ngasaika pengelantang sereta enda dikelaung.
“Ba runding aku, BR1M patut diatur ninting taun sereta diberi sebedau nembiak berengkah besekula ba pun taun.
“Lalu taun ke bukai bantu ti sebaka patut ngungkupkka ngagai orang ti enda dikemendarka taun 2012. Nya ulih ngawakka semua orang ti kurang penatai pemisi sama ngasaika pengelantang,” ku Azizmi ti bisi enam iku anak, lebuh dikerandau maya nerima baucer enggau duit RM500 nya kemari.
Lebuh ditanya baka ni chara iya ngena bantu nya, Azizimi madahka RM500 dikena melanja tiga iku anak ke benung besekula sereta dikena nyaup ngemanah kedai renchit bini iya.
Ahphan anak Gohong, 37, ari Genturung Pendiau Sogoh, Bau mega madahka bantu RM500 patut dipejalaika ba taun bukai sereta bepelasarka atur ti udah.
Iya ti gawa nyadi Office Boy madahka atur perintah ke meri bantu RM500 ngagai rayat ke patut nerima, endang berita ti manah.
“Enti ulih bantu ti baka tu diatur baru ba taun ke bukai laban nya ulih ngelempungka penekul ruang bilik ti kurang penatai pemisi.
“Lalu aku arapka perintah ulih ngena prosedur ti sama baka diatu iya nya ngemeratka orang ti ngembuan penatai pemisi dalam ruang bilik ti ari baruh RM3,000 sebulan,” ku iya ti merambu deka nyimpan duit nya enti bisi laluh ari dikena melanja anak sekula.
Alida anak Maruh, ari Serian ke udah lebih 10 taun diau di Kuching muji perintah ti ngatur BR1M ungkup rayat ti kurang penatai pemisi.
Iya ti gawa ba kompeni mit madah , bantu nya (BR1M) keterubah diatur ba menua tu, lalu dipeda ulih nambahka belanja ngagai orang ti begaji mit.
Nambahka nya Alida madahka Menteri Besai mayuh udah mai ubah ngagai menua, ti enda ngelaungka orang kurang penatai pemisi.
“Bantu BR1M tu chukup manah ngagai orang ti baka aku ke semina begaji RM800 sebulan. Nya alai ba penemu aku perintah patut bejalaika program sebaka setipak enggau juluk 1Malaysia,” ku iya ke bisi dua iku anak.
Kelimpah ari nya, Asikin Kassim, 26, ari Gentutung Pendiau Semilang, Seberang Gobilt mega sepenemu BR1M ukai semina diatur diatu aja.
“Laban tu ulih ngelempungka penekul belanja rayat ti kurang penatai pemisi.
“Ngenang pemanah BR1M tu, tambang sepenyampau RM30 pulai mansang ngena perau enggau van ukai tentu nyadika penanggul ba aku,” ku iya.
Iya ti bisi seiku anak ke beumur empat bulan lapan hari madahka bantu RM500 dikena meli perangka anak sereta ke belanja dapur.
Kemari, bisi 863 iku penerima udah nerima BR1M ke diatur ba Dewan Suarah, Kuching. Datai ngemataka pengawa nyuaka bantu nya kemari tuai raban nembiak SUPP, Tan Kai.