Taib nguluka pengabang ba pengerami ngintu TBC MBKS

0

KUCHING: Urung 1,000 iku rayat ti enda ngira pupu bansa ba mengeri Kuching datai ngabang Taun Baru Cina (TBC) Majlis Bandaraya Kuching Selatan (MBKS) ti diatur ba tengah laman opis kunsil nya.

ANGPAU: Taib nyuaka angpau ngagai orang tuai. — Gambar Kong Jun Liung

Pengerami TBC nya pagi kemari dipenyadika Kepala Menteri Pehin Sri Abdul Taib Mahmud, ke mega nyadi tuai pengabang. Taib disempulang bini iya Puan Sri Ragad Kurdi Taib.

Bala pemesai ke sama datai ngulu pengerami nya, Menteri Kunsil Kandang Menua enggau Pemansang Raban Bansa, Dato Sri Wong Soon Koh; Menteri Pemansang Infrastruktur enggau Penyambung, Dato Sri Micheal Manyin sereta raban kebukai.

Raban pengabang ditikika Datuk Bandar MBKS, James Chan.

Bisi 68 bengkah bansal pemakai enggau ai irup dibuka ngagai mensia mayuh ke datai ngabang.

Kelimpah ari bansal pemakai, mensia mayuh mega diperindang enggau mayuh bengkah aktiviti tauka pemerindang baka pemerindang atas panggau, tanda singa, enggau tanda naga.

Nambahka nya Taib mega nyuaka angpau ngagai orang tuai ke sama datai ngabang.

Nyerumba pengerami nya kemari, Taib mega bejadika palan endur ngelantangka diri iya nya Palmarium, ti dibuka ngagai mensia mayuh.