TEPA: Linggi (dimua kanan) nyuaka tepa ngagai Webber (dimua kiba), sereta dikemataka Brown (belakang kanan), Kumaran (belakang kiba) enggau Khairul (belakang tengah).
Berindik ari penetap RSPO kompeni tu mujur ngemayuhka ketau buah sawit
KUCHING: Berindik ari ti ngembuan penetap Roundtable on Sustainable Palm Oil (RSPO), kompeni Keresa Plantation Sdn Bhd mujur nambahka tandan buah sawit ninting taun.
Chairman Keresa Plantation Sdn Bhd (KPSB), Tan Sri Datuk Amar Leonard Linggi Jugah madah, Keresa mega bulih penyampau ngelui pukul rata menua enggau nengeri.
Iya madah, taja pen Keresa bejalaika pengawa nanam sawit ba tanah 6,023 hektar pemesai, tang seruran ngembuan juluk deka nambahka penyampau tandan sawit ke diketau sereta dipejalaika ngena chara profesyenal.
Keresa Plantation Sdn Bhd ti ditumbuhka taun 1996 ba Lavang Land District, Bintulu udah ngembuan pemendar RSPO iya nya ba bulan November 2010.
“Taun 2011 Keresa udah ngasilka 134, 673 metrik tan buah sawit enggau asil pukul rata 25.9 tan sehektar setaun.
“Enti dibandingka enggau pukul rata, Sarawak ngasilka urung 18 metrik tan sehektar setaun enggau renggat nasional 19 metrik tan sehektar setaun. Nyadi asil ari kebun kelapa sawit Keresa dipelabaka tinggi agi ari nya,” ku iya.
Linggi mansutka penerang iya ngagai pemberita ba aum pengarang berita bekaul enggau RSPO ti diatur ba Tun Jugah ditu kemari.
Iya ti bejaku baru madahka, pemujur nyungkakka asil tandan kelapa sawit nya ketegal bantu RSPO.
“RSPO mayuh ngembing sereta mantu kami dikena ngemanahka sustainbility, enggau meri penerang ngagai kami bakani chara mantu mensia mayuh ke ngerimbai kebun kelapa sawit ti dipejalaika Keresa.
“Pemadu beguna iya nya RSPO meransang nambahka pengelama sereta pengetan enggau mantu bansa Iban ba kandang menua nya,” ku iya.
Nyempulang Linggi ba aum pengarang berita nya kemari, Sekretari Besai RSPO, Darrel Webber; Direktor Pengatur Pengawa Keresa Plantation enggau Keresa Mill, Graeme lain Brown; Menijer Besai Plantation, A.K.Kumaran enggau Keresa Plantation Sdn Bhd Khairul Azizan Alias.