Veteran renjer Sarawak udah tumu diberi elawin

0

KUCHING: Nyangka enda nemu tauka enda ingat agi, tang veteran renjer Sarawak ke kala gawa nyadi renjer maya menua charut enggau perintah bekurung kelia udah diberi saguhati.

Penulung Ketuai Atur Pengawa Mejar Jeneral Datuk Abdul Aziz Ibrahim madah enda patut ke sida tu minta baru saguhati RM3,000 ke diberi perintah ngagai raban polis suba, ku iya.

“Perintah meri ngagai polis laban sida tu sigi nadai kala bulih saguhati enti dibanding enggau sedadu ke udah lama nerima saguhati nya nengah Elawi Badu Gawa Mubalisasi (ETPM)’.

“Nyangka sida iya enda ingat,” ku iya lalu nambah mayuh ari veteran sedadu udah bulih elawin ETPM.

Iya madah baka tu lebuh bejaku ba aum media beserimbai enggau penemuai iya nyengkaum ngatur randau entara Sapit Menteri Pengelikun Menua, Datuk Dr. Abdul Latif Ahmad begulai enggau pemesai sereta raban Markas Divisyen Pertama Infantri Malaysia enggau Briged Ke-3 Infantri Malaysia bekaul enggau SBPA ba Kem Penrissen, ditu, kemari.

Sama bisi ngulu atur pengawa nya kemari, Panglima Sedadu Darat Jen. Datuk Zulkifli Zainal Abidin, Panglima 1 Divisyen Mejar Jeneral Datuk Mohd Zaki Mokhtar, Tuai Opis Sekretariat Sedadu Darat Brig. Jen Dato Pahlawan Zulkifli Mansor, Tuai Opis Pengatur Gaji Sedadu Brig Jen Basrun Husain, Tuai Opis Ngambi Orang Gawa Brig Jen Mohd Sani Ahmad enggau Panglima 3 Briged Brig Jen Hasagaya Abdullah.

Abdul Aziz madah baka tu lebuh nimbal kemplin  digaga veteran renjer Sarawak madahka saguhati RM3,000 nya patut nyengkaum sida iya lalu ukai semina diberi ngagai polis aja laban sida pen sama bisi gawa ngetanka menua maya nya.

Menteri Besai (PM) Datuk Seri Najib Tun Razak lebuh mantaika Bajet 2012, bisi madahka polis ke kala gawa maya Perintah Bekurung Malaya entara taun 1948-1962 sereta 1962-1974 ba Semenanjung, Sabah enggau Sarawak deka bulih saguhati RM3,000.

Raban keterubah nyadi penerima iya nya Konstabel Khas, ‘Home Guard’, Polis Bantuan, Konstabel Polis Tambahan, Polis Sempadan, Polis Kampung, Polis Gerakan Am (PGA) enggau Konstabel Sarawak.