Sunday, July 12

Kes bechurika kerita mar teputar

0

MIRI: Dua iku lelaki ke endang enda jera ngereja pengawa jai mega bisi ngembuan rikut entara lima iku lelaki ditangkap polis lemai kemari laban malut diri dalam sindikit bechurika kerita mar ba sekeda pelilih menua tu.

Semua sida tu dipechaya bisi teparuk enggau pengawa bechurika kerita mar di pelilih menua  Sibu, Bintulu enggau Miri.

Nitihku cherita, semua saspek ke ditangkap nya beumur entara 20 nyentuk ke 40 taun sepengudah polis matau ulah sida ngelama lima jam.

Dulu ari nya, seraban polis ari pampang Nagang Ulah Jai Balai Polis Sentral Miri ti diketuaika Kepala Balai Cif Inspektor Nagulan Manikam bisi entudi sebuah kerita mar bansa Harrier ke ditepan dua iku saspek ke baru deka pansut ari simpang di kandang menua Tudan.

Kededua saspek nya tekenyit lebuh sedarka  polis udah nya nguji deka ngebuka diri.

Tang taja pia, seiku ari seduai nya terejun ari kerita lalu labuh ke dalam parit di tisi jalai.

Berepak enggau nya, seiku ari raban polis mujur maut pintu kerita Harrier sambil mejal deriba nya ngetu.

Taja pia, iya ke deriba nya enda bedulika jaku tegah polis tang majak diri deka mai kerita nya laju agi ngambika lalu masuk ke dalam parit awakka sida sama parai.

Raban polis enda takutka iya amang udah nya mujur ngetuka kerita sebedau seduai tu ditangkap lalu dibai ngagai balai.

Nitihku cherita dalam ke agi, sepengudah dua iku nya ditangkap seduai nya mujur nguluka polis nangkap tiga iku da agi raban sida ke bukai ba sebuah rumah di Tudan maya hari ke sama.