BDA merambu ngemansangka projek Muzium Bintulu

0

BINTULU: Kunsil Pemansang Bintulu (BDA) merambu deka ngemansangka projek Muzium Bintulu nyengkaum ngaga galeri pamandang ba Kampung Jepak sebedau Bintulu nyapai status sebuah Bandar Raya Perindustrian Mesra manggai ba taun 2020.

Menijer Besai BDA Datu Mohidin Ishak madah, sida merambu pekara nya enggau lengkas sereta deka ngereja projek nya sebedau Bintulu nyapai status sebuah bandar raya.

Ku iya, tanah udah bisi semina nganti BDA mansutka pelin ngaga muzium nya.

“Kami udah berandau enggau opis Muzium senentang pelin sereta perambu nya kelimpah ari ke ngaga galeri ba kandang projek nya,” ku iya lebuh berandau enggau pengarang berita sepenembu Pengerami Nyuaka Chek Pampas Ungkup Projek Muzium Bintulu ngagai 46 iku penerima ari Kampung Jepak ke mungkur RM6.26 miliun ba balai raya kampung nya kena Hari Enam nyin kemari.

Ku Mohidin, sida bisi pelin pemansang landskap ke besai dikena mali  Bintulu nyadi sebuah bandar raya lalu projek muzium nya siti ari nya.

Nengah pemesai tanah 54 ekar ku iya, BDA deka ngaga jalai alun,kebun bungai ke nyadi pemanah endur begambar ungkup orang ke baru nikah, padang main bol, kebun utai tumbuh ke bukai, perengkaguna ungkup mensia mayuh nyengkaum ngaga galeri lelayang.

Ku iya, BDA ijinsi ti bejalaika projek nya mega ngemeratka langgur penemu ari Menteri Muda Dagang Temuai ke nyadi Kaban Kunsil Nengeri Jepak Datuk Talib Zulpilip, numbuhka galeri pamandang senentang tusun jerita aum Kunsil Nengeri, tusun jerita pengerari mensia ba Bintulu ngelaban lanun sereta Tun Rahman ari Bintulu ti kala dipaduka nyadi Kepala Menteri kelia tauka ngaga galeri Pehin Sri (Abdul Taib Mahmud).

Ku iya, muzium enggau galeri nya ila ukai semina nguntungka mensia mayuh ba Jepak tang mega semua rayat ba Bintulu enggau temuai ari menua bukai ke datai nemuai ngagai Bintulu sereta muzium nya.

“Diatu kitai deka ngulihka belanja dulu sebedau projek tu ulih dipejalaika,” ku iya.

Iya mega madah, sekeda endur ba Bintulu deka digaga nyadi kandang menua gadung lalu BDA nyendiaka diri ngaga pemansang nyengkaum projek muzium enggau kebun bungai nyentuka Bintulu nyapai status bandar raya.