KOTA KINABALU: Porosiden Parti Maju Sabah (SAPP), Datuk Seri Yong Teck Lee manahak jominan kumaa puru om mononokodung do parti dino obuli tumanding id pomilian tagayo pogun ko-13 sundung pia ponuhuan do Kuut Takawas montok mambayar ‘saman malu’ RM1 riong kumaa Tan Sri Harris Salleh.
Minoboros isio do ponuhan Kuut Takawas dino nokomoi au kopomiraag kalayakan parti dino montok tumanding id pomilian tagayo ih porohoon do soira-ira timpu noopo.
“Ponuhuan montok mambayar RM1 riong kumaa Tan Sri Harris Salleh dino okon ko iso kasalaan. Idsuang ahal undang-undang ino okitanan tutang noopo, om calon ngawi SAPP obuli tumanding id pomilian tagayo pogun timpu rumikot,” ka dau kumaa do mononokodung ngawi parti dino om nokotindapou ngawi id Tamu Jalan Gaya hiti.
Harris ih bagas Boyoon Montiri minamail saman kumaa Yong om SAPP kokomoi kopoilaan diolo kokomoi kapal Nomad sanganu Sabah Air ih naratu id kawaigan Sembulan di ontok 6 Jun 1976.
Kinantakan ih lobi ointutunan sabaagi ‘Double Six’ dino natadon do Boyoon Montiri ih wagu poh kalantik, Tun Fuad Stephens om tolu montiri kabinet dau, iyolo diri nopo nga ih Datuk Salleh Sulong, Datuk Peter Mojuntin om Datuk Chong Thien Vun, om turu tulun ih susuai noduso.
Idsuang ahal dino, minoboros ih Yong montok papatantu do mononokodung ngawi parti kokomoi ponuhuan kuut dino nokomoi sabap tumongob iyolo do momusorou ih calon-calon SAPP au pabanaron tumanding id PRU-13.
Nokotindapou nogi id Tamu Jalan Gaya nga ih Puru Parlimen Sepanggar, Datuk Eric Majimbun, Adun Likas, Datuk Liew Teck Chan, Kumoduwo Porosiden, Amde Sidik, Bendahari Tagayo, Dullie Marie, Monunurat Tagayo, Datuk Richard Yong, Adun Luyang ih ponogi Luguan Koonduan, Melanie Chia, Luguan Komulakan, Edward Dagul, om Luguan Kopoilaan, Chong Pit Fah.