SIBU: Raban bansa Dayak lebih agi Iban patut landik milih produk ke engkeman sereta tau dijual ngambika pengawa dagang ti dipejalaika sida mendam sereta ulih nyungkak penatai pemisi raban bansa diri.
Direktor Palan Ketuai Indu Universiti Kebangsaan Malaysia (UKM), Professor Madya Madeline Berma ari Fakulti Ekonomi enggau Bejalaika Pengawa UKM madah, tebal agi raban nya bejalaika pengawa dagang baka palan pemerindang sereta nyual dagin jelu siga tang dagang ke baka nya enda tan lama laban bisi takat diri.
“Trend mensia mayuh diatu rindu agi muka palan pemerindang sereta kurang pengerindu bejualka dagin jelu siga nyadi produk dagang sida. Ukai reti madahka dagang ke baka nya enda manah tang kitai patut merening jauh ke mua sekalika dagang ke baka nya tan lama tauka enda.
“Dagang ke baka nya (palan pemerindang sereta bejualka dagin jelu siga ) bisi takat ke diri empu sereta bisi timpuh ti ditetapka. Ambika banding, palan pemerindang bisi atur kediri lalu enda tau beroperasi lebih ari maya ti ditetapka laban enti enda sida deka kena ukum. Baka nya mega pengawa bejualka dagin jelu sida, enti meda raban penerit adat sida lalu ngelarika diri. Kededua dagang nya sama bisi pemar. Kati deka ngerembaika dagang nya dudi ila?,” ku iya lebuh ke meri penerang senentang topik ‘Pemansang Indu Sarakup’ berebak enggau Seminar Sarakup Indu Dayak Sarawak (SIDS) Pampang Sibu ke diatur ba sebengkah hotel ditu, kena Hari Lima tu tadi.
Seraban 320 iku bala kaban SIDS Pampang Sibu datai ngulu seminar ke diatur beserimbai enggau Aum Besai Ninting Taun (AGM) SIDS Pampang Sibu Ke-20 sereta milih kaban exco enggau komiti nengah AGM ti ditangkanka enggau pengawa besumpah mua ke malam nya.
Sama bisi ngulu seminar setengah hari nya, Chairman SIDS Pampang Sibu, Ir Alice Jawan enggau Sekreteri SIDS Pampang Sibu, Angelyn Uchi Maseng.
Ku penemu Madeline, raban Dayak kelebih agi raban bansa Iban patut muka mata sereta landik agi milih produk dagang ti manah ke pengidup sida dudi ila.
“Pilih meh pengawa dagang ti manah ke pengidup dudi ila sereta tentuka produk ti dijual kita nya nadai sekat sereta penanggul. Enti ulih dagang nya patut ulih dipejalaika enggau manah sereta nadai takat ngambika kita ulih nambahka penatai pemisi.
“Nya alai, tampai meh jejauh sereta runding meh dedalam sebedau ngepunka dagang ti manahka pengidup dudi ila. Kena meh peluang ke bisi sereta suah agi begulai enggau mensia mayuh ke bukai,” ku iya.
Ku iya, perintah enggau kompeni luar enda ulih nyendiaka pengawa ke chukup ngagai rayat ba menua Malaysia tu laban udu besemekih, tambah mega penyampau orang ti graduate ari universiti tauka kolej majak nambah belama.
Iya mega madahka pengawa dagang ngembuan peluang ke besai dikena negapka ekonomi diri empu laban perintah endang ngemeratka raban nya baka ke diatu.
“Enti kita amat keran ati ba pengawa dagang, kita ulih mujur. Tang enti deka mujur kita entau enda ngembuan juluk ati, enda malu, enda tau enda ngembu an pengeliat ati, sanggup betapi enggau sebarang penanggul, seruran begigaka peluang, regas, kreatif sereta inovatif. Enti sentang nadai puku nya ukai nyadika penanggul laban mayuh endar ijinsi perintah ulih nulung bansa kitai.
“Suah agi enggau kos tauka sebarang seminar ti be kaul enggau pengawa dagang ngambika kita teulihka penemu sentang pengawa dagang. Ari nya kita ulih begulai engagu mensia mayuh kelebih agi bala ijinsi perintah ke bekaul sereta ulih nyaup kita sereta anang masau peluang ke bisi. Arapka nengah SIDS tu ulih nempa mayuh agi raban indu ba pengawa dagang,” ku iya.