Nembiak sekula baka reta kena nyapai pemujur menua, ku Razi

0

BETONG: Kaban Kunsil Nengeri (ADUN) Saribas, Mohammad Razi Sitam madah, nembiak sekula meh reta ke pemadu berega berebak enggau singkang perintah ngemujurka status menua maju nyerumba taun 2020.

Ku iya, institusi pelajar bejalaika batang pengawa ke beguna dikena nempa modal mensia ke tampak sereta nyulut ba pemanah ulah enggau akedemik.

Ku iya, iya arap bendar ati raban pengatur pengawa sesebuah institusi pelajar baka Maktab Rendah Sains Mara (MRSM) Betong udah merambu mayuh bengkah program ti pulaika pemujur nembiak dalam bidang akademik.

“Tuju sesebuah institusi pelajar nya ditumbuh ngambika nembiak mujur dalam bidang akademik,” ku iya.

Iya bejaku munyi nya lebuh Nutup ‘Minggu Aktiviti Semester 1, ungkup taun 2012 ba Dewan Gemilang, MRSM Betong ditu kena Hari Lima tu tadi.

Ku Razi, kelimpah ari akademik, aktiviti praktikal ba luar kelas mega ulih dikena nempa modal mensia ke nyulut sereta ngemeranka ulah bekerejasama, besemekih sereta bisi ati deka nguji ba runding nembiak.

“Kelipah ari ngeregaska fizikal enggau runding nengah program ti dipejalaika, Minggu Aktiviti nya mega nyadika pelasar endur mantaika pengelandik nyadi ketuai ti dikembuan nembiak.

“Pekara nya sebaka enggau pengawa perintah ngemansangka modal mensia sereta sebengkah ari chara dikena nempa nembiak rebak dudi ke mujur,” ku iya.

Kelimpah ari nya, iya mega ngelalau bala nembiak ngambika seruran ngemeratka pelajar sida kelebih agi nembiak ke ngambi peresa taun tu.

“Pekuhka meh pengawa belajar dikena nyendiaka diri napi peresa ti deka datai laban pemujur ba akademik nyadika tikit pengidup kita ke menyana jemah ila,” ku iya.

Razi mega arapka MRSM Betong setanding enggau MRSM ke bukai sereta ulih nempa sejarah nyadi maktab ke pemadu nyulut ba semua pekara dudi ila.

Tambah mega, juluk ke baka nya ulih dijapai enti nembiak enggau pengajar begempung sereta ngembuan pelin ke sistematik sereta chara ke ngasi.

Sama bisi ngulu pengerami nya Sapit Prinsipal Kokurikulum, Mohd Taib Mohd Said, Ketuai Opis Bahasa Mohd Asri Abdul Rahman enggau Penyelaras Minggu Aktiviti Mahamad Mahyuddin.