Thursday, December 3

Kempen ‘Anti Sampah’ DBKK apatut sokodungon

0

KOTA KINABALU: Pokionuon oh mongindapu longkod podtuongisan om hotel id Kakadayan Tagayo Kota Kinabalu tuh kapaganu do kopoimaganan linominon aiso sampa maya ababayan Kempen Anti Sampah Dewan Bandaraya Kota Kinabalu (DBKK) montok popogirot do ‘komitmen’ sektor perhotelan d kapatamangan koborisianom kinoiyoon posorili.

Pinoboros kopokionuon dino kinosutanan kapangaramitan olunggui mongindapu longkod kopodtuongisan om hotel nokomoi kempen dino, om gisom baino diti iso noh resort kikorikohonon limo bintang, ino nopo nga Nexus Resort Karambunai om iso hotel kikorikohonon apat bintang, ino nopo nga Hotel Berjaya Palace nokotorimo kopoimaganan dino.

Kumoduwo Luguan Potunud Korporat DBKK, Bahari Hassan, minoboros DBKK momoguno do sokodung toinsanan boogian doulu noh sektor perhotelan om aparagat ponombuluian montok monulung momodimpot gaab poposiliu do kakadaian tagayo ditiiso koiyonon aiso sampa.

Ka dau, sabaagi tiyonon pongidapan tutumombului, mongindapu hotel kitonggungan montok papatantu do ‘imek’ sektor ponombuluian toririmo ogompit miampai papatantu do kadalinominon sompori-pori okon noopo poposodia do kotorinaan di koposontob ginawo, nga kopokito do posorili di ogingo om oborisi.

“Kotumboyo oh tutumombului ngawi nokomoi ‘komitmen’ dino nung resort om hotel kiharo sijil koposilihan zon aiso sampa.

“Ino tantu do kaanu popoingkawas do kaanangan tutumombului miyon  id resort om hotel id kakadaian tagayo diti om koponulung mamagayat do lobi ogumu tutumombului rumikot id Sabah.

“Mantad dino, aharap tokou longkod podtuongisan om hotel di amu poh nakaanu kopoimaganan tuh sumikap montok maganu dino,” ka dau id ababayan kapanaakan sijil Zon Aiso Sampa kumaa Hotel Berjaya Palace Kota Kinabalu, doros hiti di kawawagu.

Nokotindapou nogi id ababayan dino nga Monijor Tagayo Hotel Berjaya Palace Kota Kinabalu, PhangJo See, Potunud Koupisan Kolidasan om Kotorinaan Kakadaian DBKK, Robert Lipon, Monijor Kotorinaan om Kotos Tulun Hotel Berjaya Palace kota Kinabalu, Charle Wee om Luguan Boogian Balajaran Tulun ginumuanDBKK, ih Lizawana Matin.