Penyampau asil agi jauh ari penetap asal

0

Naka ke diatu, produk raban bansa asal ke dijual ba hypermarket baru manggai sebagi ari tiga

KUCHING: Penyampau produk raban bansa asal ti dijual ba hypermarket agi ba tikas ke baruh iya nya 10.64 persin.

“Nitih atur ke udah ditetapka, 30 persin produk ke dijual ba palan dagang besai (hypermarket) patut ngarika produk ke digaga raban bansa asal,” ku Sapit Menteri Dagang Dalam Menua, Koperasi enggau Pekara Bebeli Barang Datuk Rohani Abdul Karim.

Berindik ari nya, orang dagang industri mit enggau jelan pemesai (PKS) di Sarawak kelebih agi raban bansa asal diansak ngerebut awak dagang tu, tandu iya.

Iya mansutka jaku tu ba sebengkah aum pengarang berita sepengudah bejadika ‘Program Suaian Perniagaan Antara Koperasi/Syarikat PKS Bersama Dengan Hypermarket’ ba siti hotel ditu, kemari.

Ku iya, palan dagang bebelika barang Giant ke bisi ba Kuching (2), Sibu enggau Miri udah dipilih ngadu kerejasama enggau koperasi/syarikat PKS alai produk ari PKS tau dijual ba palan dagang nya nitihka sempekat.

Program ke diatur kemari nerima timbal ke manah ari PKS alai 23 bengkah koperasi sereta 53 PKS bisi datai ngulu program kelimpah ari ke mandang produk sida iya.

“Program tu diatur enggau tuju ngadaka kaul entara PKS enggau hypermarket ke tau nyaup pengerembai PKS.

“Tu tau ngemujurka juluk ke udah ditetapka alai 30 persin produk PKS patut dijual ba hypermarket,” ku iya.

Program tu mega deka ngangkatka tikas pengulih kereja PKS sereta ngemansangka produk ngambika tau digaga mayuh agi ke ulih napi peminta hypermarket, tandu iya.

Bela bisi datai ba program nya Sekretari Perintah Besai (Sarawak) Datuk Md Yahaya Basimin, Direktor Bagi Pemansang Dagang KPDNKK Che Halim, Direktor KPDNKK Wan Ahmad Uzir, Direktor SKM Sarawak Ishak Samdin.