PIBG kosudong tuidongon id savi-avi sikul

0

Seruji minokigambal kaandaman songovian Nunda, Fatimah Shara om AJK PIBG Maktab Sabah.

KOTA KINABALU: Koisaan Mohoing om Mongingia (PIBG) nopo nga iso koisaan ih kosudong kozo kivao id savi-avi sikul sabap iho kaanu monuhung sikul om polinta poposoibau do tuhun kiguno ih tavasi om kipadamaan.

Kumoduvo Huguan Umno Boogizan Kota Kinabalu, Datuk Seruji Haji Nawawi minoboos, koponuidongan PIGB kiguno kozo montok papanau do abaabazan miampai hobi ouhud.

“Iho kaanu nogi papavakas sunduvan susumikul ngavi montok tumihombus momo’uang toihahaan balajalan ih kobi avasi om ouhud,” ka disido ontok pinotimpuun do Miting PIBG Maktab Sabah, id Dewan Serbaguna sikul dino,” di tadau Koonom nakatahib.

Nokotindapou nogi id abaabazan dino nga ih Mohoingon Sikul Kinangazan Maktab Sabah, Hajah Nuinda Haji Alias, Yang Dipertua PIBG Maktab Sabah, Datuk Fatimas Shara Ahmad Noor, AJK PIBG om mohoing ngavi.

Pokionuon di Seruji doid mohoing tu mongintong PIBG sabaagi koisaan ih kiguno hoohobi tonggungan dosido ih adadi mongintanga montok manakadai popoboos onu noopo atag kikoompitan balajalan tanak ngavi.

Ka disido, kivao tohu tonggungan ih obuli papanaon di mohoing montok popoingkavas koikoonon tanak ngavi, ino adadi mintamong ih kitonggungan, madtamong koulalahon tanak om maganu haang sabaagi pamalan kotundaan tutok tanak.

“Otumbazaan zou nung kaanu mohoing papanau do tonggungan dosido miampai tavavasi id daamin om tantu do kalaja mongingia id sikul kaanu papagaan,” ka disido.

Id boogizan sikul, ka disido mongingia ih monuvang somboogizan ‘komposisi’ PIBG apatut do kitonggungan sabaagi mohoing ih maganu kavagatan kogunoon om kotundunan susumikul.

Mantad dino ka disido, mongingia ih adadi monuduk om otootopot ‘berwatak pendidik’ popokito do koulalahon obingupus om manganggap susumikul dino miaga tanak sondii. Koozuvon diti kaanu popoinsodu onu nnopo kapaagatan au avasi ih obuli momiumbak timpu tabantakan tanak ngavi.

“Idsuang ahal dino, mohoing om mongingia kosudong monoodo pisokodungan ih topiot montok papadadi do sinakagon tokou adadi sinakagon di kinangazan tavasi katanud miampai kopokionuon mohoing montok mintong tanak dosido kaanu kahantazan,” ka disido.