KUCHING: Kaban Kunsil Nengeri (ADUN) Dalat, Datuk Fatimah Abdullah madah penemu ti ngumbai politik mayuh agi ngagai pekara negatif patut dikemetulka.
Iya ke mega nyadi Menteri Pengintu Pengelantang, Orang Indu enggau Pemansang Ruang Bilik madah mayuh pekara ti ulih dijengkau nengah politik.
Berindik ari penemu orang ngumbai politik nya negatif ngujungka kitai bisi napi pemar ngansak orang biak enggau raban indu masuk politik, ku iya.
“Sekeda orang semina nemu meretika politik nya pekara ti negatif tang penguntung tauka positif politik tu enda diperening.
“Kebendar politik tu ulih ngiring menua nyadi menua maju, ngemunaska penyeranta sereta ulih mantu rayat nuju pengidup ti lebih menyana agi enggau mayuh penguntung pemansang bukai.
“Nya alai politik enda tau enda diterangka enggau silik sereta chara ti betul ngambika penemu orang ngagai politik ulih dikemetulka,” ku iya lebuh dikerandau ba opis iya ditu kemari.
Berebak enggau tu lebuh ditanya bekaul enggau berita selebubu Raban Indu Parti Pesaka Bumiputera Bersatu (PBB) jemah ila nadai pelapis, iya madah, pekara nya enda betul.
Fatimah madahka ukai reti seseiku orang ti nyadi kaban parti tauka raban indu parti lalu bepeluang nyadi pelapis indu PBB.
Ku iya, raban pelapis indu (PBB) ulih datai sereta ngembuan penemu enggau bidang ti bebida.
“Penemu ti madahka raban indu PBB nadai pelapis nya pekara enda betul sereta runding nya agi pabu.
“Dalam politik kitai deka ke orang indu ari mayuh macham bidang laban nya ulih nyadi ngiri penemu enggau peneleba nyadi tuai, nya peluang ke manah dikena ngemarukka diri dalam politik. Kebuah pia laban politk tu mungkur semua pekara ti begunaka orang ke pandai megai mayuh macham kereja,” ku iya.