Gawai Homestay Kpg Benuk 2012, 16 Jun

0

Mayuh bengkah main asal raban bansa Bidayuh deka dipandang ngagai raban temuai maya nya ila

KUCHING: Opis Menteri Dagang Temuai Malaysia  deka ngatur pengerami ngintu Gawai Homestay Kpg Benuk 2012 kenaka 16 Jun tu.

Pengerami nya deka dipenyadika Menteri Dagang Temuai Datuk Abang Johari Tun Abang Openg alai iya mega deka bejadika Palan Main Asal Nyemilik Kpg Benuk.

Chairman Kpg Benuk Homestay, Cr Isabell Julau Mejat madah mayuh program ti mandangka main asal raban bansa Bidayuh deka dipandangka ngagai temuai maya nya.

“Adat enggau main asal ngintu Gawai ti meri puji ngagai petara ketegal deka dipandangka maya tu.

“Raban tu deka ngajat ngelingi sanggar (ranyai) nitihka tabuh gong, setawak sereta bebendai,” ku iya.

Raban main asal tu mega deka mandangka ngepan raban bansa Bidayuh bejalai ngelingi genturung pendiau , tandu iya.

Isabell mansutka penerang tu ba siti aum pengarang berita ti diatur ba Opis ‘Majlis Perbandaran Padawan’ (MPP) ditu, kemari.

Iya mega madah, ajat ‘Jekau Bayang’ iya nya pencha orang indu Bidayuh enggau ajat ‘Rejang Be-uh’ ngelaluka penatai pengabang tauka panglima Bidayuh bisi mega dipandang maya nya.

Sapit Menteri Dagang Temuai Malaysia Dato Dr. James Dawos Mamit, Menteri Muda pengerai Mensia mayuh Dr Jerip Susil enggau Sapit Speaker Dewan Undangan Nengeri Datuk Roland Sagah disadang datai ngulu pengerami nya.

Bela datai ba aum pengarang berita Chairman MPP Lo Khere Chiang enggau sapit iya Mohd Hashim Yap sereta Kunsilor Richard Kian.