Tuesday, April 23

Nokotimpuun no pongiaan boros Kadazandusun id KYS

0

KOTA KINABALU: Nokotimpuun oh pongiaan boros Kadazandusun id Kolej Yayasan Sabah (KYS) mantad po di semester nakatalib sabaagi do iso balajaran boros sompomogunan (elektif) montok susumikul ngawi do pangaan diploma.

Minoboros ih Kumoduwo Dekan KYS, Gundohing Petrus Jinuik do kinopointutunan kopongiaan boros Kadazandusun nopo dilo nga nasagaan no do Malaysian Qualification Accredition (MQA) om osiliu oh balajaran dilo pomogonop montok kapaasan diploma do susumikul kogompit.

“Osonong kopio raramit susumikul ngawi maganu do boros Kadazandusun om alansan ikoi do kapanaak kowosian kumaa susumikul oh balajaran dilo kaampai no sinonong do ponginabasan KYS,” ka di Petrus ontok norumaan id upis dau id City Campus Sembulan di kawawagu.

Baino diti, KYS nopo nga kiwaa kampus longkod id Sembulan miampai kampus raan id Likas, Kepayan om Bundusan, Penampang.

Balajaran boros Kadazandusun id KYS nopo nga oukab kumaa toinsanan susumikul miampai do au monutun nung mantad tinaru Kadazandusun toi ko tinaru do suai.

Montok semester Julai gisom Oktober, pikiikiro do 70 susumikul maganu ponginabasan boros Kadazandusun. Oinsanan susumikul dilo nopo nga ih mokiinobos do kaganaan Diploma Binaan Bangunan om Diploma Teknologi Automotif.

Gisom baino, KYS no kolej kawawagu do minongukab pongiaan boros Kadazandusun suminuhut do Institut Pendidikan Guru (IPG), Universiti Pendidikan Sultan Idris (UPSI)

Tanjung Malim, Perak, Universiti Malaysia Sabah (UMS) om sikul tosiriba miampai sikul pintangaan id Sabah.

Dumontol diti, pisosoromo do oukab oh pongiaan boros Kadazandusun id Universiti Teknologi Mara (UiTM) raan Sabah om nogi Kolej Kadazandusun Murut id kampus Kaingaran, Tambunan soira do owonsoi piipiro toun dumontol.