KOTA KINABALU: Songulun kusai kinoiyonon pinaratu ukuman danda kiginumu RM5,000 toiko kojiil turu wulan om nojil duwo toun, sabap kasalaan minoninduol kapanakon tondu dau kiumur duwo toun.
Mijon Yusuf, 49, songulun mororobuat minangakun salah id doumbangan Majistret Herlina Muse, kalapas pinanandasan binasa montok dau.
Di ontok 7 Januari nakatalib jam 3.50 sosodopon id iso lamin id Kampung Lobou, Menggatal, natandasan tuminomod minoninduol miampai kigaab moninduol manangaki dau gisom natadon do nosindualan id ponong tulu, ro om liou.
Sabap kasalaan dino, dinawa isio tumanud Seksyen 31 (1) Akta Tangaanak 2011 ih kopongobi do ukuman danda gisom RM20,000 toiko jiil gisom 10 toun.
Tumanud do kopoilaan kes, pinoporuput (tanak natandasan) minoi pomonsoi ruputan pulis di ontok 7 Julai nakatalib, minoboros do namot disio kiharo id labus lamin, nokorongou isio rolou munggui mihad sabap natandasan maso moguhod om momobog do tanak dau.
Tolu tanak pinoporuput minintong munggui kinakat di tinandasan om poloposo id sawat sirang om katil.
Pinoburu di natandasan oh koyuyuon dau dino sabap nawuk. Tadau sumusuut dino, natandasan dino ginakom do pulis.
Id pokiinsianan dau, mokianu ih Mijon moi do kagaan ukuman dau sabap nokolohing noh om maso manano parai om aiso tulun ih manamong tanom dau.
Nga, Upisor Mangadawa Insp Syahrin Ali mnoboros mositi ontokon ukuman tawagat kumaa natandasan sabap isio nopo nga taki kumaa munggui.
Maganu nogi kuut do kokiraan kopontingan munggui ih kiumur duwo toun nogi om au kopuriman (trauma) ih notoguang di tanak ngawi ih susuai.
Tumanud dau, awuk okon ko alasan montok natandasan kapaganu do ukuman ih agaan om osiliu do iso pangajaran kumaa tulun ginumuan, mantad dino ukuman danda om jiil mositi ontokon.