GEORGE
KAPIT: Kaban Kunsil Nengeri (ADUN) sitak N54 Pelagus, George Lagong setuju enggau Menteri Kanan Tan Sri Dr. James Jemut Masing ke mega Menteri Pemansang Tanah sereta ADUN N56 Baleh ba sebengkah penemu ke dipansut iya empai lama ke udah: ‘Land-rich Dayak among poorest in country’ ayan ba The Borneo Post Hari Satu, 2 Julai 2012 tu tadi.
Iya betanya nama pengawa ke udah digaga Masing dikena ngangkatka tikas penatai pemisi rayat di menua pesisir kelebih agi bansa Dayak di Kapit.
Raban bansa Dayak ngembuan pengabis besai bank tanah di menua tu, tang diatu sebengkah ari raban bansa ke pengabis ensekin setegal dua kebuah: kurang ketuai seraya raban bansa tu udu bepechah, ku Masing maya Appreciation dinner seraya Ngiling Tikai’ ba Hotel Imperial, Miri Kena Hari Enam, 31 Jun.
George bejaku ba program betemu enggau rayat ba Rumah Ikau, Sungai Mujong, Baleh ditu kena Hari Enam tu tadi. Iya bejalai betemu enggau mensia mayuh sambil mai orang bekelala enggau anak iya Dickson George ke diadangka dipilih Sarawak Worker’s Party (SWP) nyadi chalun ba Sitak Parlimen P216 Hulu Rajang.
Dickson, graduate ari University of Nottingham, England dalam bidang offshore engineering. Iya diatu nyadi menijer project ba IEV engineering Sdn Bhd, Dataran Hamodal, Block B, level 2, No. 4, Jalan Bersatu13/4 46200 Petaling Jaya, Selangor Darul Ehsan, Malaysia.
Seraya setuju enggau penemu ke dipansutka Masing iya nya ‘Land-rich Dayak among poorest in country’. Iya meri komen, “Seraya nyadi Menteri Kanan dalam kabinet nengeri, Menteri Pemansang Tanah sereta mega ADUN Baleh, iya (Masing), anang tak ngemansutka dalam surat berita aja. Nyadi wakil rayat iya patut nebahka pekara nya dalam aum Kunsil Nengeri lalu mai pekara tu ngagai aum kabinet,” ku iya.