LINGGA: Pulau Seduku, Lingga diatu tebilang nyadi palan ‘Baya Mechah’ di Sungai Batang Lupar, Sri Aman manah amat dikena matak penatai bala temuai ngagai bagi menua nya, pia ku Sapit Menteri Dagang Dalam Menua, Gerempung Kerejasama enggau Pekara Bebeli Barang Malaysia, Datuk Rohani Abdul Karim.
Ku iya, kelimpah tebilang enggau Produk Pengerami Bena sereta Pengerami Lingga ke diatur ninting taun di Bagi menua tu, Produk Pulau Seduku endur baya mechah mega ulih nyadi produk dagang temuai ke baru.
“Kami deka mantaika langgur penemu tu ngagai Opis Menteri Dagang Temuai Sarawak enggau Perintah Menua Sarawak ngambika palan baya mechah di Pulau Seduku, Lingga tu dikemansangka nyadi produk dagang temuai ke baru di Bagi menua tu.
“Kami endang ngaku Pulau Seduku tu tebilang nyadi sarang baya ke ganas di Batang Lupar, tang ditu mega meh semua baya nya betelu sereta mechahka telu sida,” ku iya.
Iya bejaku munyi nya lebuh ti bejadika ‘Program Sentuhan Rakyat’ ke diatur Radio Televisyen Malaysia (RTM) Sri Aman ba Palan Berumah Baru Genturung Pendiau Pulau Seduku semak Lingga lemai kemari.
Ku iya, enti sema langgur penemu tu diterima sereta dikemendarka, mensia mayuh ba kandang menua Lingga ulih numbuhka ‘Teksi Sungai’ dikena mai bala temuai ari menua tu enggau menua tasik merau ba kandang pulau tu ngemataka baya.
“Kelimpah numbuhka ‘Teksi Sungai’ mensia mayuh ba kandang menua tu mega tau muka restoren tauka palan bejualka pemakai ngagai bala temuai sereta ulih nyungkak penatai pemisi sida ditu,” ku iya.
Mensia mayuh ba kandang menua Lingga ditu mega bisi peluang gawa nyadin malin temuai laban sida nemu amat pasal kandang Pulau Seduku tu.
“Kami nemu, mayuh agi peluang bukai ke ulih dikereja mensia mayuh ba kandang menua tu baka muka homestay ba kandang genturung pendiau ngambika bisi endur bala temuai ke datai kitu bemalam.
“Menua Lingga tu mega tebilang enggau Ikan terubok laban perintah menua diatu benung bejalaika pansik beranakka Ikan Terubok Lingga berengkah ari taun siti nyin kemari,” ku iya.
Ku Rohani baru, ukai semina nya aja, Lingga mega tebilang enggau Projek Agropilitan sereta Palan Bumai Bedandang Besai. Semua tu ulih matak penatai bala temuai ngagai Lingga ke deka meda ubah ke nyadi nya.
Ku iya, enti sema pekara tu dikemendarka, kitai mega ulih numbuhka koperasi ti dipejalaika rayat ditu empu kena nambahka penatai pemisi sida.
Nya alai, kami amat ngarapka langgur penemu tu dikemeratka Opis Menteri Dagang Temuai Sarawak enggau Perintah Menua ngambika ulih matak mayuh agi bala temuai nemuai ngagai Sri Aman sereta meda diri empu penyelai pusat dagang temuai di Bagi menua tu,” ku iya.
Bela bisi ngulu program nya, Kepala Opis Tanah enggau Survei Pelilih Sri Aman, Mohd Razali Arshad, Menijer Ladang FELCRA Agropolitan Batang Lupar, Abu Kassim Harun, Pengari Menijer RTM Sri Aman, Zainoren Suut, pengari D.O Sri Aman, Sayed Kadir, Temenggung Abang Bohari Abang Zen, Tuai Genturung Pendiau Pulau Seduku Baru, Mohd Salleh Joh, bala ketuai opis enggau bala tuai raban bansa menua nya ke bukai.
Program nya mega di rami enggau pengawa Ngerikud Program Singgah Dolok Kelaka Raya, Bermukun, Pekit Nyura, Pekit Nyumai enggau Pekit Nusun Bunga sereta Nyuaka Hamper Hari Raya ngagai mensia mayuh di genturung pendiau Seduku Baru.