KUCHING: Stanley Maringai anak David Impi, 27, ex-AF6 (Akademi Fantasia dikeluarka Astro) berapa taun ke udah, mujur teulihka 5 iti midul ba pekit ‘World Championship of Performing Arts’ di The Westin Bonaventure Hotel & Suites di Los Angeles, USA empai lama ke udah.
Lagu ke dibai Stanley, dalam lima iti kategori, iya nya dua iti teulihka engkeraju ungkup lagu ‘Raikan Cinta’ (World Music) enggau ‘Noktah Cinta’ (Bronze Open), tiga iti midul pirak ungkup kategori ‘Music of the Night (Broadway)’, ‘My Baby You’ (pop) enggau ‘You’re Still You’ (Contemporary).
Stanley enggau semilan iku sida bukai angkat ke Los Angeles, kena 6 Julai tu tadi, ngarika menua Malaysia dalam atur pengawa ‘World Championship of Performing Arts’.
Ku Stanley, ke empai lama datai di Los Angeles, sida iya bisi enggau pekit ‘Best National Costume’ ba atur pengawa ‘LA World Day Parade’ bepekit enggau urung seratus buah menua serata dunya, ke alai tim Malaysia ba atur pengawa nya nyadi champian.
Stanley ngepan Orang Ulu enggau Iban mandangka pemanah baju bansa asal menua tu ngalahka semua menua bukai ke bisi enggau bepekit.
Entara menua ke masuk pekit nya di ‘LA World Day Parade’, iya nya Azkhbar, Kazakhstan, Lithuania, Jamaica, South Africa, Australia, New Zealand, Canada, Czech Republic, Netherlands, Russia, USA, UK, France, Sweden, Norway, Malta, Colombo, Trinidad & Tobago, Namibia enggau sekeda menua bukai.
Lebuh di Los Angeles, Stanley mega bepeluang ngagai kelas vocal ke diajar ulih Seth Riggs, iya nya seiku pengajar vocal ke tebilang di US ke kala ngajar penyanyi tebilang baka Michael Jackson, Whitney Houston enggau Mariah Carey.
Kelimpah ari nya, pemuzik Malaysia mega bepeluang ngagai seminar ‘Music Business’ (Worldwide) ke dibantaika Presiden of the National ssociation of Record Industry Professionals (NARIP), Tess Taylor.
“Aku berasai temegah ati laban enda nyangka teulihka semua 5 iti midul ba semua lima kategori ke dipasuk aku. Pekit WCPA balat ngayanka semekih lalu nyangka bisi pedis mimit deka menang. Nya alai, aku beterima kasih ngagai Tuhan sereta semua ke udah nyukung aku,” ku iya.