BINTULU: Tim A ari Sekula Primari Perintah (SK) Agama Bintulu mujur nyadi champian ba pekit ngaga ‘rangoli’ tauka pengias lantai ti digaga ari beras ti mayuh bengkah chura diatur Maybank Bintulu beserimbai enggau program Sehari Begulai Enggau Maybank ba mua premis bank nya ditu Hari Enam tu tadi.
Enggau pemujur nya Tim A udah ngalahka 10 tim bukai ti sama masuk dalam pekit tu tadi ngujung ke sida ulih mai siti midul disempulang perais bukai ari Maybank Bintulu.
Lumur dua pulai ngagai Tim B ari SJK Chung Hua lalu lumur tiga pulai ngagai Tim B ari SJK Chung Hua ti sama bisi nerima siti midul lalu perais bukai ti diagihka Maybank ngagai sida.
Lapan iti tim bukai ti sama bela masuk ba pekit ngaga “rangoli” tu tadi iya nya SK St Anthony (Tim A), SK Agama Bintulu (Tim B), SJK Sebiew Chinese (Tim A), SK Orang Kaya Mohamad (Tim A), SK Orang Kaya Mohamad (Tim B), SJK Sebiew Chinese (Tim B), SK St Anthony (Tim B) lalu semua team tu tadi mega sama bela bisi diberi perais sagu ati ari komiti pengatur program.
Ba program tu mega, Maybank Bintulu bisi ngangauka 11 bengkah premis tauka wakil pengedar entukar ti bisi ba menua Bintulu tu ngambika ulih ngelakuka entukar ti bisi dikeluarka kompeni sida ba luar mua penatai Maybank ditu.
Barang sapa ti bisi ati deka meli entukar maya tu tadi mega deka diberi diskaun sereta rega ti murah agi enti dibanding enggau hari bukai.
Ba program tu, dia deh komiti pengatur bisi ngangauka band ‘akustika’ dikena merindang mensia mayuh ti bisi datai sehari nya lalu aiskrim pechuma mega bisi disadung ngagai mensia mayuh.
Komiti pengatur mega bisi ngaga pantang sementara ti nadai bebayar ngagai barang sapa ti ngaga pantang ba tubuh nitihka chura ti dikedeka sida empu.
Program tu endang siti ari pengawa Maybank Bintulu ngerapat kaul enggau mensia mayuh ba kandang menua Bintulu lebih agi ngagai sida ti bisi bejalaika pengawa dagang enggau Maybank.
Menijer Auto Finance Centre Bintulu Gracie Chang Soon Noi bela bisi datai ngulu program nya.