SIBU: Penyalah Bedagangka Mensia, penusah ke nyadi ba dunya sereta nuntung mayuh bengkah menua nyengkaum Malaysia.
Mandal Presiden Komiti Pengelantang Pendiau Nembiak Mit Malaysia (MKKM) Datuk Dr. Raj Karim madah, penyalah nya entara penyalah ke lama endar udah dikereja di dunya sereta meri penguntung ke besai ngelui penguntung ari bedagangka senyata.
Ku iya, 70 persin kes nya nyadi ba orang indu enggau nembiak mit, ditangkanka 50 persin agi nyadi ba nembiak ke baruh ari umur 18 taun.
“ Kes tu mayuh endar raban tu berindik ari peminta ke tinggi dalam industri pemerindang, palan beurut enggau mayuh macham agi.”
“ Orang indu ditipu sebaka enggau orang lelaki, gawa nyadi kuli sepengudah disemaya dibayar gaji ke besai,” ku iya.
Iya bejaku munyi tu ba ‘Seminar Bedagangka Orang’ ke diatur MKKM begulai enggau komiti ‘Anti Bedagangka Orang sereta Mai Masuk Orang Nengah Chara Belalai ‘ (MAPO).
Orang ke kena jual nya suah betapi enggau penanggul baka kena jamah enti sema enda nurutka peminta ijin ke udah meli sida tauka begunaka servis sida.
Orang ke kala kena jual nya deka betapi enggau penanggul ke dikumbai ‘trauma piskologi enggau emosi’ sepemanjai pengidup sereta patut diintu tauka dipayung.
Nya alai ku iya, arapka seminar ke baka nya tau nyadi pelasar ke pemadu manah endur berandau sereta nyeliahka penusah nya kelebih agi di Sibu.
Sibu ba tengah – tengah menua Sarawak, sereta udu ngerembai mansang engka enda tinggal ari dituntung penusah nya, ku iya baru.
Ku Dr. Raj, baka selama tu penyalah nya dipejalaika sendikit menua enggau antarabansa sereta meraka garis entara menua lalu nadai menua pan ulih nyeliahka diri ari dituntung penusah nya.
Raj mega arapka seminar nya meri penemu ngagai semua kelebih agi ngagai ketuai raban bansa ba menua tu.
Arapka seminar nya ulih negapka mensia mayuh enggau diri sebilik lalu ngintu diri sebilik ngambika enda dituntung penusah nya, ku iya.
Bela bisi ngulu seminar nya, pengari Residen Bagi Menua Sibu Maria Nadja enggau Temenggung Sir Andrian Ringgau.