Perintah nandu pengawa kelinik mindah kin-kitu, servis ngintu pengerai menua pesisir enggau lutur terebai kelimpah ngaga mayuh kelinik: Mohd Azhar
SIBU: Opis Menteri Pengerai Malaysia (KKM) deka ngemeranka agi servis ba kandang menua pesisir Sarawak enggau Sabah.
Sapit Ketuai Seketari KKM Dato’ Dr Mohd Azhar Yahaya madah, opis menteri sida ngemeranka dua buah nengeri tu bepelasarka gaya rampa menua enggau tikas sistem perengka pengangkut agi mengkang kurang.
“Nya alai, mayuh agi kelinik deka digaga baru ba menua pesisir kelimpah ari kitai nandu pengawa kelinik mindah kin-kitu, servis ngintu pengerai menua pesisir enggau lutur terebai,” pia ku iya.
Iya mantaika pekara nya maya macha teks jaku Ketuai Seketari KKM Datuk Kamarul Zaman Md Isa rambau bejadika Pengerami Konvokesyen Institusi Latihan Kementerian Kesihatan Malaysia Zon Sarawak ba sebengkah hotel tebilang ditu, kemari.
Ku iya madahka baru, nyempulang servis nya, bala raban ari opis pengerai ke gawa ba menua pesisir deka disungkak agi enggau penemu bekaul ke baru.
“Raban tu deka seruran dilatih ngambika ulih meri servis ke manah ngagai bala ba menua pesisir,” ku iya.
Berebak enggau tu mega Mohd Azhar madah, ninting taun perintah menua mayuh mubuhka puku belanja ngagai Opis Menteri Pengerai dikena ngangkatka agi tikas servis raban opis menteri tu ngagai rayat.
“Ba taun 2005, sepenyampau RM7.5 biliun diungkup ngagai opis kitai lalu tu niki dua kali lipat tauka semak 100 persin ngagai enda kurang RM14.9 biliun diberi baru ngagai kitai taun siti suba.
“Puku ungkup enam taun tu tampak bendar mandangka perintah ngemeranka pengelikun pengerai rayat,” ku iya.
Puku tu ku iya dikena nyeruri sereta ngaga kelinik menua pesisir enggau sepital baru napi penyampau tubuh rayat ke majak nambah ninting taun.
Dikena nimbal pekara tu, ku Mohd Azhar, bala raban opis pengerai aruh chakah agi numbuhka asil pengawa ti kreatif enggau inovatif seririh enggau jeman teknologi kemaya dia.
“Kitai mesti berani napi ubah baru ngambika ulih meri servis ti bekualiti nundaka peminta mensia mayuh ti seruran ngarapka servis pemadu manah ari kitai.
“Nya alai, Kelinik Mindah Kin-Kitu, Kelinik 1Malaysia, Kelinik Ngeli Mindah Kin-Kitu 1Malaysia enggau ‘Klinik Separa Perubatan’ diatu ulih diasaika semua tiap tubuh rayat baikka ba kandang mengeri tauka menua pesisir,” ku iya madah.
Nambahka nya, ku iya, dikena nimbal peminta perintah, opis menteri pengerai mega udah nyediaka diri ngaga tranfromasi ba tiap bengkah atur pengawa ke bekaul.
“Ketegal tu, tiap iku raban opis pengerai aruh bisi elemen inovasi enggau kreativiti maya bejalaika tanggung pengawa diri,” pia ku iya madahka baru.
Pengawa ti ngerami 1,674 iku graduate tu bela dikemata Direkter Opis Pengerai Nengeri Sarawak Dr Zulkifli Jantan, Seketari (Bahagian Pengurusan Latihan) Opis Menteri Pengerai Malaysia Dato’ Abu Bakar Othman enggau bala pemesai ke bukai.