Ari pemesai 289, 816 hektar tanah ke diungkup, 214, 181 hektar udah ditanam ngena kayu Acacia
KUCHING: Kayu Acacia Mangium tebal agi ditanam dalam kampung ‘Licence For Planted Forest’ (LPF) ti udah ditetapka serata Sarawak.
Nitihka penerang ari Sapit Direktor Opis Kampung Sarawak Hii Tow Peck, 73.9 persin ari penyampau 289, 816 hektar tanah ke diungkup ari baruh program LPF diseleti ngena kayu acacia.
“Program LPF dipunka ba taun 1997 lalu nyentukka taun 2011 urung 214, 181 hektar tanah udah ditanam enggau kayu bansa Acacia.
“Tu ngarika 73.9 persin ari penyampau semua tanah LPF ti udah ditanam lalu iya ke lebih nya ditanam enggau kayu bansa Batai (10.3 persin), Eucalyptus (7.0), Kelampayan (6.5) sereta kayu bukai 2.3 persin,” ku iya.
Iya mansutka penerang tu ba licha ‘Industry Update’ ti diatur ba Dewan Seminar, Sarawak Timber Industry Development Corporation (STIDC) ditu, kemari.
Ku iya, perintah nengah Opis kampung Sarawak udah nyendiaka 1,309, 878 hektar tanah ungkup program LPF lalu nagit sejuta hektar tembu ditanam enggau kayu maya manggai ba taun 2020.
“Program tu diatur ngambika Sarawak enda pungkang asil perengka kayu ke nyadi bengkah industri ti udah ngangkatka ekonomi nengeri jemah ila.
“Pemujur program LPF deka ngurangka pengawa nebang batang dalam kampung tuai kelimpah nentuka Sarawak semampai ngembuan pengeraja asal ari kampung,” ku iya.
Iya madah ba taun 2006, program LPF nyapai tikas pemujur ti besai alai 48,000 hektar tanah udah ditanam enggau kayu. Taja pia penyampau nya majak kusut ke alai taun 2011 semina 13,000 hektar aja ditanam.
“Mayuh kebuah ti ngujungka pekara tu nyadi. Nitihka timbal ari kompeni ti bejalaika pengawa tu, sida iya napi penanggul ba isu tanah NCR, temuda, pemakai menua, kurang orang gawa, gaya hari ti enda menuku, kurang puku enggau bantu ari perintah,” ku iya.
Perintah Nengeri Sarawak nagit sejuta hektar tanah ungkup program LPF ditanam enggau kayu manggai ba taun 2020 ngambika tau ngemansutka 15 juta cubic meter asil ramu.
Ba taun 2011, Sarawak ngemansutka 9.6 juta cubic meter kayu batang ari kampung tuai lalu penyampau tu enda chukup nangkup peminta industri kayu ramu dalam Sarawak.
Licha ‘Industry Update’ matak 104 iku orang ari bemacham ijinsi datai kelimpah ari ke matak speaker ari menua Korea enggau India ke bisi kaul enggau pengawa nyeleti kampung.
Licha nya dipenyadika Sekretari Mendam Opis Menteri Pengatur Pengeraja Asal enggau Rampa Menua Datu Sudarsono Osman.