KOTA BELUD: Tohu tinaan kaamung sapasang misasavo kahapas nokoompit id kapaagatan kahasaan momoguno dadah id duvo pinonugkuan misusuvai doiti.
Huguan Polis Uvang Kota Belud, Deputi Superitendan Mohan Nadasen minoboos id pinonugkuan kopinamot ‘operasi tapis’ (OPS Tapis) id iso hamin poindos Kampung Letinggi doiti, songuhun kusai kiumul 46 toun om savo disido ih kiumul 45 toun tinaan sabap ‘positif’ dadah.
“Asil kopoihaan tuhun ginumuan noihaan do pulis do om minanaan goduvo-duvo suspek id tampat dino nokomoi.
“Poniisan vaig sobu nokomoi dosido (suspek) noihaan positif dadah kavo syabu,” ka disido miampai minanamba pasangan misasavo dino baino tinaan montok ponoizukan potihombus tumanud Seksyen 15 (1) (a) Akta Dadah Kohigogon 1952.
Namot dino, id pinonugkuan id Kampung Tempasuk, songuhun kusai kinoizonon kiumul 23 toun tinaan kahapas noihaan kiva 17 paket plastik oniting ih kikotumbazaan syabu kivinagat 1.9 gram.
“Suspek ih kikotumbazaan nadadi papatazad dadah id kampung dino nokomoi baino tinaan montok ponoizukan tumanud Seskyen 12 (2) Akta Dadah Kohigogon 1952,” ka disido.
Idsuang ahal dino, pokionuon di Mohan oh tuhun ginumuan tuh tumihombus misokodung miampai kokuasaan pulis miampai manaak kopoihaan kokomoi onu noopo kapaagatan dadah id uvang dino.