Thursday, August 18

Anang teparuk kena achuk SWP

0

PANTU: Semua pengundi ba sitak parlimen Sri Aman dilalau bejejaga ari achuk parti penyakal lebih agi Parti Pekereja Sarawak (SWP)

Kaban Parlimen Sri Aman, Masir Kujat bejaku munyi nya ngambika enda mudah teparuh kena achuk sekeda penemu bansa Iban ari SWP maya sida bejalaika pengawa politik lebih agi ba kandang menua pesisir jam ke diatu.

Ku iya, SWP ke ngumbai diri nelap Barisan Nasional (BN), nya endang enda amat.

“Pemula ke madahka sida (SWP) bebakih sereta nelap BN endang enda amat. Penemu nya dikena sida lebih agi ba sitak parlimen Sri Aman nginti sukung ari rayat.

“SWP ukai kaban BN. Sida nabur penemu munyi nya dikena ngelabur mata enggau penemu rayat,” ku iya.

Masir bejaku munyi nya lebuh bejadika Pengerami Ketuai Begulai Enggau Rayat ba Rumah Laham, Bangkong Tengah, Lachau di Pelilih Mit Pantu, ensana.

Berebak enggau nya Masir madah, semua pemansang ke disepi rayat diatu tanda penyakah sereta penyiru perintah BN ngelama tu.

“Perintah BN ngenataika semua projek pemansang ditu. Ari nya, aku mai kitai semua ngetanka sitak parlimen Sri Aman tu maya pengawa bepilih besai ila,” ku iya.

Bela bisi datai maya nya, Pemesai Opis Hal Ehwal Khas (JASA) Parlimen Sri Aman, Whelton Lumpoi, sekeda ketuai raban bansa ngelingi Lubok Antu.