Monday, July 4

Pengawa belaki tauka bebini aruh direjister ba JPN: Enyang

0

SIBU: Laki bini ke agi beumur biak dilalau ngambika ngerejister surat tikah ba Opis Pengerejister Bansa (JPN) ke besemak enggau lengkas.

Penghulu Enyang Menchol madah, pekara tu tau ngemuntangka agi pengawa ngerejister tikah enti dibida nengah atur Majlis Adat Istiadat.

“Enti nitihka proses nya, mayuh bengkah atur deka dibantai nyengkaum bekenaka sain ari tuai rumah.”

“Nya alai pekara tu bekenaka awak ti lama enti dibida terus rejister ba JPN,” pia ku iya madah.

Iya mantaika jaku nya ba sebengkah pengerami makai lemai ditu, malam ensana.

Ku iya, tebal agi laki bini ke beumur biak kemaya hari tu kisuk gawa lalu nadai mayuh awak pulai ke menua.

Kelimpah ari nya, ku Enyang, atur ngerejister tikah ba JPN nadai mayuh kelikuh lalu tau nyeliah penusah beranak tumu ari tikah.

Bisi kes nyadi ku iya madah, indu beumur biak ngandung apin jadi melaki bini.

“Enti pekara tu nyadi, ukai semina mai pemalu ngagai sida sebilik tang mega tau nekul pengawa ngaga setipikit peranak,” ku iya nambah.

Berindik ari pekara nya, Enyang ngarapka tuai raban bansa tauka tuai rumah sereta chairman Komiti Pengelikun Genturung Pendiau (JKKk) lebih agi ba Sibu Jaya ditu beratika pekara nya enggau silik agi.

Taja pan sida enda direjister nyadi tuai raban bansa tauka chairman JKKK ba Opis Kunsil Sibu, tang sida ngembuan tanggung pengawa ti besai.

Nambahka nya, bansa Iban ba Sibu Jaya mega majak betambah ninting taun.

Kelimpah ari nya,ku Enyang madah, sida (ketuai raban bansa) mega megai tanggung pengawa bekaul enggau komiti Skim Matau Enda Bebayar (SRS) ba tuju ngemunaska penyalah rama ba Sibu Jaya.

“Ba pekara nya (munaska penyalah rama), kaul sida bangat beguna ukai semina nyadung penemu tang mai peranak beserakup lalu enda maruk diri enggau pengawa salah,” pia ku iya madahka baru.

Nengah chara baka tu, penyalah rama ba Sibu Jaya mega ulih diputarka lalu mai pengelikun ngagai peranak ke nguan genturung pengentap pendiau dia.