Peranak rumah panjai lantang ati nadai nangi tanah tusur

0

ENDA NANGI: Ding (empat kiba) sereta raban bukai ninjau penembu projek dikena nagang tanah tusur ba mua rumah panjai Antam, Ulu Bayong.

SARIKEI: Mensia mayuh ke nguan Rumah Antam Ali ba Jalai Empangan Gerugu, Sungai Anggie, Ulu Bayong, urung 50 kilometer ari tu berasai lantang endar seput sereta enda nangi tanah tusur laban udah digaga tekat ba mua rumah panjai 20-pintu sida.

Ku Kaban Parlimen, Ding Kuong Hiing ke ngabas rumah panjai nya kena Hari Lima minggu nyin kemari madah, projek ke beungkus RM190,000 datai ari belanja projek perengkaguna.

Lebih 100 iku orang ke nguan rumah panjai nya berasai takut lebuh sida tetemuka kelai bisi tanah tusur ba rumah panjai sida kena bulan Januari taun tu tadi.

Taja pia, pemesai ari Opis Kereja Raya madahka pekara nya bedau balat nyadi. Sida lalu mai pekara nya ngagai Opis Residen ngambika pekara nya diperundingka sida.