KUCHING: Barang sapa ke sengapa ngengkah entukar ba kandang palan nya, besendi enggau Palan Penyangkai Bilun Antarabansa Kuching (KIA) deka ensepi ditinggang atur ke terit.
Seiku pemesai ari MAB (enggai nama iya dipansut) madah, MAB dalam kandang setaun tu, udah meri nutis ngagai orang mayuh, ke madah, barang entukar ke diengkah ba sengapa alai tauka ba garis kuning deka dikunchi.
“Taja pen nutis nya udah diberi dalam kandang setaun tu ke udah, tang kami semina ngambi atur kena 1 Ogos tu tadi,” ku pemesai nya madah ngagai Utusan Borneo kemari.
Pemutus tu digaga berindik ari kerejasama ke dipesetuju maya forum begulai enggau opis pengelikun KIA, opis perengka guna komiti KIA, komiti ngemutarka penumpang lalu nyengkaum sukung Opis Kunsil Bandaraya Kuching Selatan (MBKS).
“Sebaka enggau atur ke digaga ba Sepital Besai Sarawak (HUS) ditu.
Kami sigi lama udah deka ngaga atur tu, datai ke kami nerima surat kompelin ari Perintah Menua (Opis Menteri Pengawa Dagang Temuai) enggau Opis Gerempung Dagang Temuai Sarawak (STF) ke madahka mayuh orang kompelin pasal atur paking kerita ba KIA..Kebuah kami ngaga atur tu,” ku iya.
Ketegal kerita enda diengkah memanah ba palan paking, lalu sekeda nya peneka ati paking ba garis kuning, kerita sida iya kena rindas kerita orang bukai.
“Sapa ke kena anu tauka kena kompelin udah nya? Kami ba opis MAB ke kena anu.
Tang sida (sekeda orang mayuh) enda nemu penyalah diri tauka ngaga diri enda nemu lebuh paking kerita ba garis kuning.
“Utai baka tu ke nyadi. Sida iya enda ngiga sapa ke ngerindas kerita sida tang ngiga MAB. Tambah, ketegal sekut jalai ba palan paking kerita nya, ke ngujungka kerita bukai tusah pansut ari nya,” ku iya.
Nya alai, ku pemesai nya, kelimpah ari meri nutis ba palan paking kerita nya, opis MAB mega deka ngengkah surat ba kerita ke enda diengkah memanah.
Iya mega madah, paking enggau chara ke salah mega di luar terminal KIA mega nyadi penanggul.
“Tang diatu, ke nyaga di luar terminal, polis, Opis Pengangkut Jalai (JPJ) enggau PGA.
Nya alai, enti salah paking, opis ke bekuasa (PBT) tu ngeluarka saman,” ku iya.
Iya nambah baru, ba kes orang mayuh ke paking di atas garis kuning dalam palan paking, kerita sida iya deka dikunchi.
“Pekara biasa lebuh MAB ngaga atur baka nya, kami ke kena anu.
Baka sehari tu tadi, seiku orang ke sigi gawa ba KIA ditu empu pen, kerita iya kena kunchi.
Iya patut nemu laban ninting hari ke keluar masuk ditu.
“Bisi kebuah kami ngaga atur baka nya enti enda tegal orang mayuh kompelin, ukai rindu ati deka nyaman orang,” ku iya.
Kerita ke kena kunchi ba palan paking KIA mesti dibayar ngagai opis MAB, enggau penyampau RM50 sekali ditemu salah, lalu udah nya seiku pemesai ari PBT deka muka kunchi tayar nya.
Semina kerita ke paking dalam palan paking nya empu ke dibayar ngagai Metro Parking dalam penyampau RM1 sejam.
Enti paking ba luar sitak palan paking tauka garis kuning, saman nya ke dibayar ngagai MAB.
“Tang diatu, ninting sejam, orang gawa kami deka madah nengah Public Announcement (PA) enti sema kerita ditemu enda paking enggau manah.