LICHIN: Lawrence (kiba) enggau seiku kaban SDA lasu.
KUCHING: Kaban Gereja Seventh Day Adventist (SDA) di Kuching kemari udah sama enggau kaban gerija di Pulau Pinang ngatur kimpin ‘go bald’ dikena ngumpul wang turu ungkup pengidap penyakit riman.
Tuju kimpin tu nya mantu Hospital Adventist Penang (PAH) ngulihka saran penyampau RM388,000 ungkup wang turu sepital nya mantu perubat pengidap penyakit riman.
Presiden SDA Sarawak Pastor Lawrence Banyie madahka pengawa nya diatur ba sekula Sunny Hill kemari beserimbai enggau pengawa ‘88 Shining Heads’ ke diatur di Pulau Pinang nyerumba hari sepital nya genap 88 taun.
Iya indah ngenuluka orang bukai ngelasu pala udah nya ditangkan sida ke bukai.
“Duit ke digumpul nya deka diserah ngagai PAH ke alai aku mega nyadi kunsil pemegai reta,” ke iya lebuh ke dikerandau udah bekau ke dilasu pala.
Iya madahka pengawa ke diatur di Kuching, ambis kurang RM100 deka dichabut ari sepala ke dilasu. Urung 50 iku orang diadangka deka ngelasu pala diri di Kuching.
Baka ke ba penyampau, 88 iku orang nyengkaum orang ke benama VIP diadang bebuai gundai ungkup pengawa nya ke diatur di padang belakang PAH.