Kuching enggau Miri deka chakah agi ngemansangka industri dagang temuai

0

SANTUBONG: Pampang pengawa dagang temuai deka dikemeratka kelimpah ari pemansang ke benung digaga di SCORE.

Menteri Dagang Temuai, Datuk Amar Abang Johari Tun Openg madah dua buah sitak ke udah diberi kelala, iya nya pelilih menua Kuching enggau Miri.

“Opis Menteri kami (KPS) deka mansik chara ke pengabis manah dikena ngangkatka dua buah pelilih menua tu,” ku iya madah lebuh bejaku di atur pengawa ‘Majlis Ramah Tamah Aidil Fitri 2012 Santubong Homestay’ di Kpg Santubong ditu, kemari.

Iya madah, pelilih menua Limbang mega beminat minta dipasuk dalam perambu pengawa dagang temuai enggau kerejasama ke digaga enggau menua Brunei Darussalam.

“Tu ngayanka perintah ngemeratka pemansang industri servis, iya nya pengawa dagang temuai,” ku iya.

Abang Johari ti mega nyadi Menteri Pengawa Berumah madahka semenanjung Santubong nyadi siti sitak ke dikemansangka enggau infrastruktur lalu sitak nya ila deka digempung enggau pemisi ke manah di sitak Lundu enggau Sematan.

Iya madah, opis (State Planning Unit tauka SPU) udah diasuh ulih opis menteri nya (KPS) enggau Opis Menteri Pengawa Dagang Temuai Malaysia mansik sekeda pemansang infrastruktur ke deka dikemansangka entara Lundu enggau Sematan, mungkur Rabongan enggau Telaga Air sereta Santubong.

“Enti ari semanjai nebing Santubong, kitai ulih merau nengah Sg Salak datai ke Kpg Semariang, alai deka digaga jeti.

“Enti di Santubong kitai ulih ngena kapal, perau ngagai sitak Semariang lalu penudi iya endar ngagai Bandaraya Kuchin. Reti nya, mayuh agi chara bukai ke ulih dikena kitai kelimpah ari jalai alun,” ku iya lalu madah nengah pejalai nya temuai mega ulih meda pemanah rampa menua kitai.

Ba atur pengawa nya mega, iya madahka Perintah Menua benung beruding enggau Perintah Besai bekait enggau penerebai bilun ke patut dikemutarka.

“Dalam jurai nya, bisi peluang ke manah. Berindik ari nya, aku baum enggau Kepala Menteri Melaka, bakani deka ngaga ‘smart partnership’ narit minat temuai ari menua China ngagai menua kitai laban kitai bisi kait sejarah di entara menua China, Melaka enggau Sarawak,” ku iya.

Kelimpah ari nya mega, iya madahk beserimbai enggau atur pengawa Sarawak deka nyambut 50 taun merdeka dalam Malaysia (di taun 2013), Perintah deka ngaga mayuh agi pemansang di Bandaraya Kuching.

“Iya madah siti projek besai, iya nya ngaga jembatan entara Kuching Waterfront enggau Dewan Undangan Negeri Baru (DUN).

“Jematan tu semina ulih ditengah orang bejalai kaki enggau basikal aja, lalu ba tengah-tengah nya deka digaga ‘kiosk’ alai orang belelak makai satay, mee kolok, tauka Laksa Sarawak.

“Maya belelak nya mega, kitai sama ulih meda Bandaraya Kuching nyengkaum bukit Matang di belakang enggau perau ke bisi di Sg Srawak,” ku iya.

Kelimpah ari nya mega, tebing sungai deka digaga manah agi enggau ngaga jeti, sereta marina.

Abang Johari madah baru, penembu Plaza Merdeka (semak enggau palan polis sentral), deka digaga siti palan khas ke temuai nyengkaum Merdeka Plaza, India Street, Gambier Street, Carpenter Street, Main Bazaar enggau Jalai Gambier.