DIPENYADI: Francis (tengah), Masir (kanan Francis), Alhias (kanan Masir), Abdul Samad (kiba Francis) begulai enggau ketuai raban bansa bukai ngeruyah lemang tanda bejadika pengawa nya.
SRI AMAN: Perintah Barisan Nasional (BN) deka chakah agi gawa ngambika rayat di menua tu majak ngasaika pemansang, ku Kaban Parlimen Sri Aman Masir Kujat.
Ku iya, asil ari gempung ke rat antara rayat enggau perintah, perintah nadai penanggul bejalaika pemansang belama di menua tu kelebih agi enti rayat majak bediri tegap ba belakang perintah ke diatu.
“Genap bengkah pemansang ti dipejalaika ba menua tu datai ari perintah Barisan Nasional (BN), ukai ari penyakal.
“Naka ke ditemu kitai, nadai kala penyakal meri pemansang ngagai rayat di menua tu. Pemansang ke bisi diatu baka jalai alun, karan, ai beresi enggau pemansang ke bukai nya endang datai ari perintah BN,” ku iya.
Iya bejaku munyi nya ba Pengerami ‘Ramah-tamah Hari Raya Aidilfitri 2012’ ke diatur begulai enggau semilan JKKK ba Genturung Pendiau Muhibbah, Rancangan Perumahan Rakyat (RPR), Taman Sentosa Indah, Taman Srijaya enggau Taman Harmoni, Sri Aman tikas Parlimen Sri Aman enggau DUN Simanggang ba Dewan Suarah Sri Aman ditu malam ensanus.
Ku iya rayat menua tu patut nyeliahka semua polisi ke dibai penyakal laban polisi nya bula magang sereta dikena ngerachun runding rayat ngambika nyukung sida.
“Endang udah gaya penyakal genap kali semak maya pengawa bepilih, sida mantaika diri sempama kulat tumbuh sepengudah hari ujan, mai mayuh macham cherita bejaika perintah.
“Anang nunda ulah ke baka nya laban sida semina deka mechahka penyerakup enggau ngachau pengelantang rayat di menua tu.
“Penatai sida ngagai kandang menua kitai ditu semina deka bejaika perintah ke bisi diatu laban sida ngembuan juluk ati deka ngrampas kuasa ari perintah ke diatu,” ku iya.
Nya alai rayat patut nyeliahka semua petenah ke dituduh raban penyakal ngagai perintah Barisan Nasional (BN), tang sida patut majak tegap bediri ba belakang perintah ke bisi diatu.
Sama bisi ngulu pengerami nya, Menteri Muda Pemansang Menua Pesisir enggau Pengawa Berumah Sarawak ke mega Kaban Kunsil Nengeri (ADUN) Simanggang Datuk Francis Harden Hollis, Pemesai Penyerakup Enggau Integrasi Nasional Bagi menua Sri Aman Rickado Dorlen, Pengulu Abdul Samad Abdul Rahim enggau Chairman Komiti Pengatur Pengerami Alhias Muhi.