DIKEAMAT: Harden (tengah), Masir (lima kiba) ngemataka pengawa besuaka dokumen projek, Casiddy Morris (enam kanan) ngagai pengari kompeni Megas Maju ba SMK St Luke ditu, kemari.
Projek ke beungkus RM650,000 nya disadang tembu 3 March taun baru, ku Harden
SRI AMAN: Penusah tanah tusur ke nyadi ba kandang Sekula Primari (SK) enggau Sekula (SMK) Saint Luke Sri Aman deka diputarka enda lama agi. Projek nya beungkus RM650,000.
Menteri Muda Pemansang Menua Pesisir enggau Pengawa Berumah, Datuk Francis Harden Hollis madah, projek nya deka dikereja dalam kandang 26 minggu sereta disadang tembu kena 3 March taun baru.
Ku iya, Kompeni Megas Maju Sendirian Berhad (Sdn Bhd) udah dikearapka ngereja pengawa nya nyengkaum ngaga parit, papan pal, tiang api sereta nanam pun kayu.
“Aku meri terima kasih kepada ngagai perintah laban ti nyediaka belanja ungkup projek tu, pengamat iya lama udah dikemendarka sebedau penyakal mantaika penanggul tu ba media chelak,” ku iya.
Harden bejaku munyi nya enggau pengarang berita tembu pengawa nyuaka dokumen kontrak projek ari Opis Kereja Raya (JKR) Bagi Menua Sri Aman ngagai kompeni Megas Maju Sdn Bhd ba SMK Saint Luke, ditu, ensanus.
Ba pengerami, Injinir Bagi Menua JKR Sri Aman Cassidy Morris udah nyuaka dokumen projek nya ngagai kompeni Megas Maju seraya dikemataka Harden enggau Kaban Parlimen Parlimen Sri Aman, Masir Kujat sereta raban opis perintah ke bukai.
Kelimpah ari nya, Harden mega madahka projek ngemanahka Loji Meresi Ai di Bayai ke beungvkus RM43 miliun, diatu baru manggai ba tikas 2.44 persin kenyau projek nya udah bengkah kena 23 Mei taun tu tadi.
Baka nya mega enggau Projek Fasa I ngaga Sepital Baru (ngerata) ba Sri Aman ke beungkus RM9.6 miliun benung dipejalaika kompeni Golden Matrix, ku iya.
“Aku arapka semua pemansang ke benung dipejalaika perintah Barisan Nasional (BN) nya ulih nyungkak tikas pengidup rayat ba kandang menua Sri Aman tu dudi ila,” ku iya.